Монгол Улсын Ерөнхийлөгч Ухнаагийн Хүрэлсүхийн урилгаар манай улсад хүрэлцэн ирээд буй Бүгд Найрамдах Австри Улсын Ерөнхийлөгч Александр Ван дер Беллений төрийн айлчлал үргэлжилж байна. Айлчлалын нэг чухал үйл явдал нь өнөөдөр Шангри-Ла зочид буудалд болсон “Дугуй ширээний бизнес уулзалт” байв. Уулзалтыг Монголын Үндэсний худалдаа, аж үйлдвэрийн танхим болон Австрийн Холбооны эдийн засгийн танхим хамтран зохион байгуулсан юм.

Ерөнхийлөгч У.Хүрэлсүх уулзалтыг нээж хэлсэн үгэндээ, Монгол Улс хөрөнгө оруулалтын орчныг тогтвортой, урт хугацааны итгэлцэлд тулгуурласан байдлаар хөгжүүлэхийг зорьж буйг онцлоод, Австрийн дэвшилтэт техник, технологи, туршлага нь манай улсын 14 стратегийн мега төсөлд чухал үүрэг гүйцэтгэнэ гэдгийг онцлов. Мөн Европын Холбооны хөнгөлөлтийн ерөнхий системийн хүрээнд 7200 нэр төрлийн бүтээгдэхүүнийг гаалийн татваргүйгээр экспортлох боломжийг ашиглан хамтын ажиллагааг тэлэхийг уриалав.

Австрийн Ерөнхийлөгч Александр Ван дер Беллен өөрийн үгэндээ худалдаа, хөрөнгө оруулалтыг харилцан эрчимжүүлэх нь хоёр орны иргэдийн ойлголцол, найрсаг харилцааг гүнзгийрүүлнэ гэж үзэж буйгаа илэрхийлэв. Мөн Австри улс хөдөө аж ахуй, аялал жуулчлал, дэд бүтэц, эрүүл мэнд, эрчим хүчний салбарт Монгол Улстай туршлагаа хуваалцахад бэлэн байгааг мэдэгдэв. Түүнчлэн Монголын эдийн засгийн өсөлт Австрийн олон компаниудын анхаарлыг татаж байгааг онцлон дурдав.

“Дугуй ширээний бизнес уулзалт”-д Монголын талаас 80 орчим компани, Австрийн долоон салбарыг төлөөлсөн 22 аж ахуйн нэгж оролцсон бөгөөд талууд хамтын ажиллагааг нэмэгдүүлэх, шинэ түншлэл байгуулах, технологи, ноу-хау шилжүүлэх талаар санал солилцов.

Одоогийн байдлаар Монгол Улс Австрид гянтболдын хүдэр, баяжмал, савхин хувцас, ямааны ноолуур, малын гаралтай түүхий эд, хүнсний бүтээгдэхүүн нийлүүлдэг бол Австриас техник, машин механизм, хими, эрчим хүчний бүтээгдэхүүн, цахилгаан бараа, автоматжуулалтын тоног төхөөрөмж импортолдог байна.

Эх сурвалж: Монгол Улсын Ерөнхийлөгчийн Тамгын газар, МҮХАҮТ