Бүгд Найрамдах Австри Улсын Ерөнхийлөгч Александр Ван дер Беллийн төрийн айлчлалын хүрээнд Австрийн Холбооны эдийн засгийн танхимын дэд ерөнхийлөгч Филип Гади тэргүүтэй төлөөлөгчид Монгол Улсын Эрүүл мэндийн яаманд зочилж, хоёр улсын эрүүл мэндийн салбарын хамтын ажиллагааг гүнзгийрүүлэх талаар албан ёсны уулзалт хийлээ.

Энэхүү уулзалтаар Монгол, Австрийн Засгийн газар хооронд хэрэгжиж ирсэн нэн хөнгөлөлттэй зээлийн хүрээнд амжилттай хэрэгжсэн төслүүдийн үр дүнг дүгнэж, цаашдын боломжуудыг хэлэлцсэн байна. Мөн айлчлалын хүрээнд хоёр улсын хоорондын хамтын ажиллагааг өргөтгөх зорилгоор нэн хөнгөлөлттэй зээлийн дөрөв дэх удаагийн санамж бичгийг хэрэгжүүлэх, шинэ төслүүдийг эхлүүлэх талаар санал солилцжээ.

Талууд дараах чиглэлээр хамтын ажиллагааг гүнзгийрүүлэх сонирхлоо илэрхийлэв. Үүнд:

• Хорт хавдрын урьдчилан сэргийлэлт, оношилгоо, эмчилгээний төвүүдийг хөгжүүлэх

• Эрүүл мэндийн хог хаягдлын менежментийг сайжруулах

• Сэргээн засах болон эрчимт эмчилгээний хүний нөөцийг бэлтгэх, чадавхжуулах

• Эмнэлгийн тоног төхөөрөмжийн хангалтыг сайжруулах

• Олон улсын стандарт хангасан эм, эмнэлгийн хэрэгслийг нэг эх үүсвэрээр төвлөрүүлэн худалдан авах тогтолцоо бүрдүүлэх

Энэхүү уулзалт нь хоёр орны эрүүл мэндийн салбар дахь хамтын ажиллагааг илүү үр дүнтэй, стратегийн түвшинд хөгжүүлэх суурийг тавьж байгаагаараа онцлог юм.