УИХ-ын нэгдсэн чуулган өчигдөр /2025.05.26/ хуралдаж “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийн хавсралтуудыг хэлэлцсэн. Хэлэлцүүлгээр тогтоолын төсөлтэй холбоотой зармын зөрүүтэй саналыг хураалгаж дууссан тул гурав дахь хэлэлцүүлэгт бэлтгүүлэхээр Эдийн засгийн байнгын хороонд шилжүүлжээ.

Тогтоолын төслийг хэлэлцэх үеэр АН-ын дарга, Эдийн засгийн хөгжлийн сайд Л.Гантөмөр дараах байр суурийг илэрхийлсэн байна. 

Эдийн засаг хөгжлийн сайд Л.Гантөмөр:

-Төрийн албыг цомхотгоход УИХ оролцоотой баймаар байна. Иргэдийн орлого хэрхэн нэмэгдэх вэ гэвэл үндсэндээ манай хувийн хэвшлүүдийн үйл ажиллагаа сайжирч байж, баялаг бүтээж байгаа хүмүүсийн орлого сайжирч байж л бид нарын орлого, цалин хөлс нэмэгдэнэ. Энэ бол хууль. Тийм учраас хувийн хэвшилдээ татварын таатай нөхцөл бий болгохоор Засгийн газар тодорхой шийдэлд хүрсэн. Энэ шийдлээ өнгөрсөн долоо хоногт МАН-ын бүлгийн хурал дээр танилцуулсан байх гэж бодож байна. Тиймээс үүн рүүгээ эргэлзээгүй алхах хэрэгтэй. 

Гаднын банк байгуулах ажил бол төв банкны эрх мэдлийн хүрээнд байгаа. Үүнийг УИХ шахах ёстой. Зээлийн хүү буурах ганцхан нөхцөл байгаа, тэр бол инфляци буурах. Инфляцыг бууруулахын тулд төр өөрөө худалдан авалт дээрээ дамын наймаанаас салах хэрэгтэй. Үүнээс салаад хиймэл оюун ухаанд өгчих юм бол яваандаа үнэ буурна.Эрэлт нь буурахаар хувийн хэвшил буюу иргэд дээр очих бараа бүтээгдэхүүний үнэ буурах боломжтой. Нөгөө талдаа боловсролын үнэ төрийн мэдэлд байна. Жишээлбэл, Засгийн газар их сургуулийн үнийг яаж тогтоох вэ гэдгээ гаргачих хэрэгтэй. Ингэж Засгийн газар хийж чадах зүйлээ хийгээд явбал инфляци буурна. Тэгвэл яваандаа зээлийн хүүг бууруулах боломжтой.