Шадар сайд, ХҮН-ын дарга Т.Доржханд цаг үеийн нөхцөл байдлын талаар байр сууриа илэрхийлж, Ерөнхий сайд Л.Оюун-Эрдэнийн орлого, хөрөнгийн асуудал, хамтарсан Засгийн газрын эргэлзээт ирээдүй, улс төрийн зарчмын хандлагын талаар нээлттэй өгүүллээ.

Тэрбээр Монгол Улсын хөгжилд улс төрийн зөвшилцөл, эв нэгдэл шаардлагатай байгааг онцлон, “Монгол Улс хөгжье гэвэл хамтрахаас өөр аргагүй. ХҮН нам орон даяар салбартай, 100 мянга гаруй гишүүн, дэмжигчтэй, улс төрийн том хүчин болсон. Тиймээс бид улс орны эрх ашгийг нэн тэргүүнд харж байгаа юу, эсвэл намын ашиг сонирхлыг урдаа тавьж байна уу гэдгийг МАН-д асуусан” хэмээн мэдэгдлээ.

Мөн АН-ын зарим төлөөлөгчдийн сөрөг хүчин байхын төлөө явж буй хандлагыг шүүмжилж, “Хамтарсан засагт орчихоод сөрөг хүчин шиг аашилна гэдэг улс орны эрх ашигт нийцэхгүй” гэв.

Ерөнхий сайд Л.Оюун-Эрдэнийн хөрөнгө орлогын ил тод байдалтай холбоотойгоор тэрбээр дараах байдлаар байр сууриа илэрхийлсэн юм:
“Орлогоо нотолж чадахгүй бол явах нь улс төрчийн үүрэг. Энэ бол хамтарсан засгийн газрын асуудал биш. Ерөнхий сайд өөрөө ‘сэтэрхий зүү, сиймхий хадаг авсан бол хариуцлагаа хүлээнэ’ гэж хэлсэн. Хууль хяналтын байгууллагууд шалгаж байгаа, хүүхэд нь ч ирээд шалгуулж байна” гэж онцлон тэмдэглэв.

Түүнчлэн АН-ын дарга Л.Гантөмөртэй хамтран ажиллаж байсан туршлагыг дурсаж, “Бид нам харгалзахгүйгээр үр дүнтэй ажилласан. Тэнд ямар ч эрх ашиг, хулгай байгаагүй. Маш сайн баг бүрдүүлж ажилласан” хэмээн үнэлгээ өглөө.

ХҮН намын хувьд, улс төрийн аливаа шийдвэрийг тууштай, зарчимтайгаар хандуулахыг шаардаж, засаглалын ил тод байдал, хариуцлагын тогтолцоог бэхжүүлэх байр суурь баримталсаар байна.