Өнгөрсөн долоо хоногийн баасан гарагаас эхлэн зарим шатахуун түгээх станцуудад АИ-92 шатахууны үнэ нэмэгдсэнтэй холбогдуулан Аж үйлдвэр, эрдэс баялгийн сайд Ц.Туваан байр сууриа илэрхийллээ.

Сайд Ц.Тувааны мэдээлснээр, 5-р сарын 5-нд нефть импортлогчидтой уулзалт хийж, 25-ны өдөр дахин хэлэлцэх тохиролцоо хийсэн ч импортлогчид яриагаа зөрчиж, гэнэт үнэ нэмэх шийдвэр гаргасан байна. Үүнд холбогдуулан Аж үйлдвэр, эрдэс баялгийн яам болон үнийн зөвлөл хамтран ажиллаж, мэдэгдэл гаргасан бөгөөд амралтын өдрүүдэд ч нөхцөл байдлыг хянаж ажилласан гэв.

Импортлогч компаниудын зүгээс үнэ нэмэх шалтгаанаа валютын ханшийн өсөлт гэж тайлбарлаж байгаа бол Ц.Туваан сайд энэ байр суурийг няцаан:
“Гадаад зах зээл дээр шатахууны үнэ нэмэгдээгүй. Харин дизель түлшний үнэ тонн тутамдаа 100 ам.доллараар буурсан үзүүлэлттэй байна” гэж мэдэгдлээ.

Мөн Шунхлай компаниас АИ-92-аас бусад төрлийн шатахуун, дизель түлшний үнийг бууруулсан талаар мэдээлэл ирснийг дурдсан бөгөөд энэ бол зөвшилцлийн үр дүн гэж үзэж байгаагаа илэрхийлсэн юм.

Гэсэн ч тэрбээр шатахууны үнийн зохицуулалтын талаар:
“Яам болон төрийн зүгээс үнэ нэмсэн асуудалд шууд авч хэрэгжүүлэх арга хэмжээ хомс байдаг. Бид зах зээлийн зарчмаар, зөвшилцөл байдлаар ажиллах шаардлагатай” хэмээн тайлбарлав.

Ард иргэдээс ирсэн гомдолд үндэслэн Шударга өрсөлдөөн, хэрэглэгчийн төлөө газар руу хандсан бөгөөд үнийн зөвлөл албан ёсоор дахин хуралдаж, нөхцөл байдлыг үнэлэх юм. Сайд Ц.Туваан нефть импортлогч компаниудыг энэ асуудалд илүү хүлээцтэй хандах ёстой гэж үзэж байгаагаа илэрхийлсэн бөгөөд “улс төрийн нөхцөл байдал, иргэдийн сэтгэлзүй ийм байхад үнийн асуудлыг давхцуулан сөхөх шаардлагагүй байсан” хэмээн анхааруулсан байна.

Одоогийн байдлаар шатахууны нөөц хангалттай, нэг сараас дээш хугацаанд тогтвортой байдлаар хангах хэмжээнд байгаа гэдгийг сайд мэдээлэлдээ дурдсан байна.