УИХ-ын гишүүн Л.Мөнхбаясгалан улс төрийн нөхцөл байдалтай холбогдуулан байр сууриа илэрхийллээ. Тэрбээр хамтарсан Засгийн газрын асуудал, Ерөнхий сайдын огцрох магадлал, төрийн ажлын саатал, улс төр дэх хариуцлагагүй байдал зэрэг сэдвийг онцолж, нээлттэй шүүмжилсэн юм.
“Хурдхан огцроод, дараагийнхыг нь томилоод, ажлыг үргэлжлүүлмээр байна. Төрийн ажлыг ингэж гацааж болохгүй. Бүх яам, төрийн алба, УИХ дээр ажил зогссон байдалтай байна. Сайд нар ч орж ирэхгүй байна” хэмээн тэр шүүмжлэлтэйгээр хэлэв.
Түүний хэлснээр, өнөөдрийн улс төрийн үймээн төрийн ажлыг үгүйсгэж, 2025-2026 онд улс орны хийх ажлыг тодорхойгүй, санхүүгийн эх үүсвэргүй байдалд хүргээд байна. “Мега төслүүдийнх нь техник эдийн засгийн үндэслэл ч байхгүй. Тэгээд бүгд сандал, ширээ, дарга, сайд болох санаатай гүйлдэж байна. Үүнийг цэгцэлмээр байна” хэмээн улстөрчдийн хандлагыг хатуу шүүмжиллээ.
Тэрбээр мөн:
“МАН-аас ямар нэгэн албан ёсны шийдвэр цаасан дээр ирээгүй. Ерөнхий сайдыг орлогоо нотол гэсний төлөө хамтарсан засаг муу ажиллалаа гээд унагаана гэдэг бол үнэхээр бодлогогүй, харамсмаар үйлдэл. Гэхдээ харамсах завгүй байна. Ажил явуулах хэрэгтэй” гэж онцолсон юм.
Эцэст нь, Л.Мөнхбаясгалан одоогийн улс төрийн нөхцөл байдлыг шуурхай зохион байгуулж, тодорхой шийдэлд хүрч, төрийн ажлыг хэвийн үргэлжлүүлэхийг уриалсан юм.
