Засгийн газрын Хэрэг эрхлэх газрын дарга Н.Учрал цахим мөрийтэй тоглоомын сөрөг нөлөө, хууль эрх зүйн шинэчлэлийн талаар байр сууриа илэрхийллээ. Тэрбээр энэ төрлийн үйл ажиллагаа Монгол Улсын эдийн засаг, иргэдийн амьдралд ихээхэн хохирол учруулж буйг онцолж, цахим мөрийтэй тоглоомыг бүхэлд нь хориглох шинэ хууль хэрэгжиж эхэлж байгааг мэдэгдэв.

Н.Учралын хэлснээр, өнөөдрийн байдлаар цахим мөрийтэй тоглоом зохион байгуулдаг 110 орчим агент, тэдгээрийн дунд 2-3 хувийн шимтгэлээр орлого олдог зуучлагчид байгаа нь зохион байгуулалттай сүлжээний шинжтэй болсон байна. Тэрбээр:
“Цахим мөрийтэй тоглоом тоглох, зохион байгуулах, дэмжих, сурталчлах бүх хэлбэрийг хориглоно. Банк, санхүүгийн байгууллагууд хяналт тавьж, мөрийтэй тоглоомтой холбоотой гүйлгээг хязгаарласнаар эрсдэл 60 хувиар буурах боломжтой” гэв.

Тэрбээр мөн сүүлийн жилүүдэд цахим мөрийтэй тоглоомын улмаас олон өрх, иргэн өрөнд орж, амьдрал нь хүнд байдалд орж буйг тэмдэглээд, “Цахим мөрийтэй тоглоомоос хохироогүй хүн үлдэхээ больсон. Энэ бол нийгмийн гамшиг” хэмээн тодотгов.

Тоо баримтаас үзвэл:

• Жилд 500 сая ам.доллар буюу 1.7 их наяд төгрөг

• Зөвхөн хоёрхон сарын хугацаанд 50 гаруй сая ам.доллар гадагш урссан байна.

Эдгээр нь бүгд цахим мөрийтэй тоглоомын гүйлгээнд хамаарах бөгөөд ийм их хэмжээний хөрөнгө гадагшлах нь Монгол Улсын эдийн засагт сөргөөр нөлөөлж байна гэж үзжээ.

Н.Учралын хэлснээр, эхний ээлжид цахим мөрийтэй тоглоомыг бүхэлд нь хориглож, дараагийн шатанд спортын төлбөрт тааварт тусгай хууль, зохицуулалт хийх төлөвлөгөөтэй байгаа аж.