Ерөнхий сайд Л.Оюун-Эрдэнийн огцрох эсэх, Засгийн газрын бүрэлдэхүүнд өөрчлөлт орох эсэх асуудал улс төрийн төв тайзан дээр яригдаж эхэллээ. Монгол Ардын Намын Бага хурлаас Ардчилсан намыг хамтарсан Засгийн газраас гаргах шийдвэр гаргасан тухай мэдээлэл цацагдсан ч, уг шийдвэрийг УИХ-д албан ёсоор оруулж ирээгүй байгаа нь тодорхой бус байдал үүсгээд байна.

Энэ талаар УИХ-ын гишүүн Х.Тэмүүжин байр сууриа илэрхийлэхдээ:
“Хамтарсан Засгийн газрын гол бүрэлдэхүүн болсон Ардчилсан намыг 42 суудалтай МАН хасна, энэ намгүйгээр засгаа байгуулна гэсэн шийдвэр гаргасан. Гэвч энэ шийдвэрийг УИХ-д өнөөг хүртэл оруулж ирээгүй нь ойлгомжгүй байдал үүсгэж байна” хэмээн тэмдэглэв.

Тэрбээр мөн:
“Ерөнхий сайд огцорно гэсэн яриа гарсан. Хэрэв нам нь шийдвэр гаргасан бол Ерөнхий сайд өөрөө УИХ-д өргөдлөө оруулж ирэх ёстой. Ардчилсан нам энэ үйл явцыг хүлээж байна” гэж мэдэгдлээ.

Түүнчлэн Х.Тэмүүжин:
“Засаг байгуулахдаа МАН өөрсдөө биднийг урьж хамтарсан. Ажил хийе гэвэл хамтарч ажиллана, хийхгүй гэвэл бид сөрөг хүчний байр сууриндаа эргэн очиж чадна. Ямар нэгэн үл ойлголцол гарсан бол шийдвэр гаргасан тал нь хариуцлагатайгаар асуудлаа хурдан шийдэх ёстой. Бид бол хүлээж байна” хэмээн хатуу байр суурь илэрхийллээ.

Улс төрийн нөхцөл байдалд тодорхой хариулт гараагүй хэвээр байгаа ч, Ерөнхий сайдын шийдвэрийг Ардчилсан нам анхааралтай ажиглаж, хүлээлтийн байдалтай байгаагаа илэрхийлж байна.