УИХ-ын дарга Д.Амарбаясгалан өнөөдөр Монгол Улсад төрийн айлчлал хийж буй Бүгд Найрамдах Австри Улсын Ерөнхийлөгч Александр Ван дер Белленд бараалхлаа. Уг айлчлал нь Монгол, Австрийн хооронд дипломат харилцаа тогтоосноос хойш 62 жилийн хугацаанд хэрэгжиж буй анхны төрийн айлчлал бөгөөд хоёр орны харилцааны түүхэнд шинэ хуудас нээж буй онцгой үйл явдал хэмээн тэмдэглэлээ.

УИХ-ын дарга ардчилал, хүний эрх, хууль дээдлэх зарчим зэрэг нийтлэг үнэт зүйл дээр тулгуурласан харилцаа, хамтын ажиллагаа өргөжин тэлж байгааг онцолж, Монгол Улсын ардчилсан тогтолцоо, парламентын засаглал, чөлөөт эдийн засгийн бодлогыг Австри Улс тууштай дэмжиж ирсэнд талархал илэрхийлэв.

Талууд парламент хоорондын харилцаа, хамтын ажиллагааг өргөжүүлэн, хууль тогтоох байгууллагуудын түвшинд харилцан туршлага солилцох, парламент дахь бүлэг хоорондын хамтын ажиллагааг идэвхжүүлэх, эрх зүйн орчныг сайжруулах чиглэлд хамтран ажиллахаар санал солилцсон байна. Мөн хүний эрхийг хангаж, олон нийтэд ойлгомжтой, иж бүрэн хууль эрх зүйн тогтолцоог төлөвшүүлэх чиглэлд хамтын ажиллагааг хөгжүүлэх тухай Монголын талаас санал тавьжээ.

Түүнчлэн хоёр улсын парламентад Монгол-Австрийн парламентын бүлэг байгуулагдсан бөгөөд тус бүлгийн даргаар УИХ-ын гишүүн Н.Батсүмбэрэл, дэд даргаар Б.Батбаатар, Х.Болормаа нар ажиллаж байгаа бол гишүүдэд Ж.Алдаржавхлан, Ш.Бямбасүрэн, Ц.Мөнхбат, Т.Мөнхсайхан, М.Нарантуяа-Нара, С.Одонтуяа нар багтсан талаар УИХ-ын Хэвлэл мэдээллийн газраас мэдээлсэн байна.

Эх сурвалж: УИХ-ын Хэвлэл мэдээллийн газар