Монгол Улсын Батлан хамгаалах яам 2025 оныг “Эх оронч Монгол – Их сэргэлтийн жил” болгон зарлаж, батлан хамгаалах тогтолцоонд бодит сэргэлт хийх, үндэсний сөрөн тэсвэрлэх чадавхыг эх оронч үзэлд тулгуурлан бэхжүүлэх зорилтыг дэвшүүлэн ажиллаж байна. Энэхүү зорилгын хүрээнд өнөөдөр Батлан хамгаалахын сайд С.Бямбацогт Зэвсэгт хүчний нэгтгэл, анги салбар болон яамны харьяа байгууллагуудад “Nissan Navara” загварын 20 автомашин гардуулан өглөө.
Сайд С.Бямбацогт “батлан хамгаалах бодлогын цөм нь хүн” гэдгийг онцолж, салбарын хөгжлийг дэмжих зорилго бүхий 17 зорилтын нэгийг энэ өдөр хэрэгжүүлж буйг дурдсан юм. Энэ нь Батлан хамгаалах яамны гүйцэтгэлийн төлөвлөгөөнд тусгагдсан бөгөөд тоног төхөөрөмж, логистикийн шинэчлэлийг бодит ажил болгох эхлэл болж байна.
Мөн өнгөрсөн гуравдугаар сард Бүгд Найрамдах Өмнөд Судан Улсад энхийг сахиулах үүрэг гүйцэтгэж буй цэргийн багийн техникийг “Toyota” загварын 14 автомашинаар шинэчилсэн нь тус салбарын олон улсын үүрэг гүйцэтгэлд дэмжлэг үзүүлж буй чухал алхам байсныг онцолжээ.
Цаашид батлан хамгаалах салбарын бүтцүүд, анги салбар, цэргийн нэгтгэлүүдийг ачааны болон тусгай зориулалтын техник хэрэгслээр үе шаттайгаар хангах, үүнийгээ цогц бодлогоор дэмжих зорилт тавин ажиллаж буйг Батлан хамгаалах яам мэдээлсэн байна.
Эх сурвалж: Монгол Улсын Батлан хамгаалах яам
