Соёл, спорт, аялал жуулчлал, залуучуудын салбарын бүсчилсэн зөвлөгөөн 2025 оны тавдугаар сарын 25-ны өдөр Сэлэнгэ аймагт амжилттай зохион байгуулагдлаа. Зөвлөгөөнд Сэлэнгэ, Дархан-Уул, Төв аймгийн холбогдох салбарын 87 удирдах албан тушаалтан оролцож, салбар хоорондын бодлого, төлөвлөлтийн асуудлаар санал солилцон, бүс нутгийн онцлогт нийцсэн шийдлүүдийг хэлэлцлээ.

Зөвлөгөөний үеэр Сэлэнгэ аймгийн Засаг даргын орлогч Ж.Сайнцог бүсчилсэн хөгжлийн үзэл баримтлалын хүрээнд орон нутгийн брэндинг, соёл, спорт, аялал жуулчлалын салбарын бодлогыг урт, дунд, богино хугацаанд хэрхэн төлөвлөх тухай чухал байр сууриа илэрхийлж, 2026 оны улсын хөгжлийн жилийн төлөвлөгөөнд тусгах зорилгоор зөвлөгөөнийг зохион байгуулж байгааг онцолсон юм.

Өнөөдрийн байдлаар Сэлэнгэ аймагт соёл, урлагийн 26 байгууллагад 300 гаруй, спортын салбарт 140 гаруй албан хаагч ажиллаж, ард иргэдэд соёлын үйлчилгээ үзүүлж байна. Аймгийн хэмжээнд нүүдлийн соёлын өвийг хадгалах, сурталчлах, соёлын бүтээгдэхүүний чанар, хүртээмжийг сайжруулах, нийтийн биеийн тамирыг дэмжих зэрэг бодлогын зорилтуудыг дэвшүүлэн хэрэгжүүлж байгааг мөн танилцуулсан.

Зөвлөгөөний үеэр ажил, хөдөлмөрөөрөө манлайлсан зарим ажилтнууд төрийн дээд одон медалиар шагнагдлаа. Үүнд:

• “Алтан гадас” одон: Сэлэнгэ аймгийн Орхон сумын Соёл, спортын төвийн дарга Б.Амартуяа

• “Хөдөлмөрийн хүндэт медаль”: Сэлэнгэ аймгийн СУАЖЗГ-ын ажилтан С.Мөнгөнцэцэг

• “Соёлын тэргүүний ажилтан” цол тэмдэг: Төв аймгийн Заамар сумын СТ-ийн дарга Г.Ууганбаяр

• ССАЖЗЯ-ны “Жуух бичиг”:

  • Төв аймгийн Баяндэлгэр сумын соёлын төвийн дарга Б.Түвшинбаяр

  • Төв аймгийн Баян сумын соёлын төвийн дарга Ш.Өнөржаргал

  • Дархан-Уул аймгийн СУАЖЗГ-ын мэргэжилтэн Б.Долгормаа

  • Сэлэнгэ аймгийн СУАЖЗГ-ын мэргэжилтэн С.Хишгээ

Энэхүү зөвлөгөөн нь бүс нутгуудын хамтын ажиллагааг гүнзгийрүүлэх, туршлага хуваалцах, үндэсний үнэт зүйлсийг түгээх, соёлын бодлогын хөгжлийн чиг хандлагыг тодорхойлох чухал алхам болж өнгөрлөө.

Эх сурвалж: Соёл, спорт, аялал жуулчлалын яам