Монгол Улсад нисэх хүчин үүсэж хөгжсөний 100 жилийн ойд зориулсан баярын хурал өнөөдөр зохион байгуулагдлаа. Хурлыг Зам, тээврийн хөгжлийн сайд Б.Дэлгэрсайхан нээж үг хэлсэн бол Монгол Улсын Ерөнхийлөгч У.Хүрэлсүхийн мэндчилгээг Ерөнхийлөгчийн Тамгын газрын дарга Г.Занданшатар сонордуулсан байна.

Тэрбээр мөн энэ үеэр Монгол Улсын Ерөнхийлөгчийн 2025 оны тавдугаар сарын 21-ний өдрийн зарлигийг уншиж, Иргэний нисэхийн ерөнхий газрыг Хөдөлмөрийн гавьяаны улаан тугийн одонгоор шагнаж буйг зарлан, шагналыг гардуулсан юм.

Хурлын үеэр нисэхийн салбарын түүхэн хөгжил, өнөөгийн байдал, цаашдын зорилт, зорилго, ирээдүйн чиг хандлагыг хэлэлцэж, салбарт олон жил ажиллаж, эх орныхоо хөгжилд үнэтэй хувь нэмэр оруулсан нэр бүхий хүмүүст төрийн дээд одон, медаль гардууллаа.

Монгол Улсад нисэх хүчин үүссэн түүхийг сөхвөл, анхны ачаа тээврийн Ю-13 онгоц 1925 онд Консулын дэнжид амжилттай газардсанаар энэ салбар үндсэн сууриа тавьсан гэж үздэг. Харин 1989 онд манай улс Олон улсын иргэний нисэхийн тухай конвенцид нэгдэн орсноор БНХАУ, ОХУ, БНСУ, Тайланд, Япон зэрэг улс орнуудтай агаарын тээврийн хамтын ажиллагаа эхэлжээ.

Өнгөрсөн оны байдлаар Монгол Улс дэлхийн 48 улстай агаарын харилцааны гэрээ байгуулж, шинээр 11 нислэгийн чиглэл нээсэн бөгөөд одоогоор дэлхийн 22 улсын 60 гаруй хот руу тогтмол нислэг үйлдэж байна. Энэ нь олон улсын тавцанд манай иргэний нисэхийн салбарын нэр хүнд, хамрах хүрээ өргөжин тэлж буйг илтгэж байна.

Эх сурвалж: Зам, тээврийн хөгжлийн яам, Ерөнхийлөгчийн Тамгын газар