УИХ-ын гишүүн, Төсвийн байнгын хорооны дарга Ц.Даваасүрэн өнөөдөр НҮБ-ын Хүн амын сангийн Ази, Номхон далайн бүсийн дэд захирал Александар Саша Бодироза тэргүүтэй төлөөлөгчдийг хүлээн авч уулзлаа. Уулзалтын эхэнд тэрбээр НҮБ-ын Хүн амын сангийн хэрэгжүүлж буй хөтөлбөрүүд тодорхой үр дүнд хүрч байгаад талархал илэрхийлж, ялангуяа эхийн эндэгдлийг бууруулах чиглэлд гарсан ахиц нь бодитой амжилт хэмээн онцолсон юм.

Түүний хэлснээр, 100 мянган төрөлт тутамд 200 орчим байсан эхийн эндэгдэл өнгөрсөн арван жилийн хугацаанд 20 хувиар буурсан нь Хүн амын сангийн хөтөлбөрүүдийн үр нөлөөг харуулж байна. Мөн алслагдсан бүс нутгийн эрүүл мэндийн тусламж, үйлчилгээг дэмжиж буй үйл ажиллагаа нь цаг үеэ олсон, нэн шаардлагатай бодлого болохыг тэмдэглэв.

Ц.Даваасүрэн цааш нь Монгол Улсын 2026 оны төсвийн хүрээний мэдэгдэл болон 2027-2028 оны төсвийн төсөөллийг хэлэлцэж буйг дурдан, УИХ-аас боловсрол, эрүүл мэндийн салбарын санхүүжилтийг бууруулахгүй байх бодлого баримталж буйг илэрхийллээ. Тэрбээр уг санхүүжилтийг дотоодын нийт бүтээгдэхүүний таван хувьд хүргэх зорилт тавин ажиллаж байгааг мөн тодотгов.

Александар Саша Бодироза Монгол Улс эхийн эндэгдлийг 1994 оноос хойш тогтвортой бууруулж чадсан нь бүс нутгийн хэмжээнд онцлох жишээ болсон хэмээн онцолж, сүүлийн хоёр жилд эрүүл мэндийн санхүүжилт дотоодын нийт бүтээгдэхүүний гурван хувьд хүрээд байгааг дурдлаа. Тэрбээр “Алсын хараа 2050” бодлогын баримт бичигт тусгагдсан 6 хувийн зорилтод УИХ анхаарч буйд талархал илэрхийллээ.

Эх сурвалж: УИХ-ын Хэвлэл мэдээллийн газар