НИТХ-ын Засаглал, эрх зүйн хорооны хуралдаан тавдугаар сарын 22-ны өдөр болж, хорооны дарга Б.Сэмжидмаа хэлэлцэх асуудлуудыг танилцууллаа. Хуралдаанаар төр, хувийн хэвшлийн түншлэлээр хэрэгжүүлэх бүтээн байгуулалтын томоохон төслүүд болон захиргааны бүтцийн өөрчлөлттэй холбоотой нийт долоон асуудлыг хэлэлцсэн байна.
Тухайлбал, “Дулааны V цахилгаан станц” төслийг төр, хувийн хэвшлийн түншлэлээр хэрэгжүүлэх асуудлыг “Улаанбаатар түншлэл төв” ХХК-ийн гүйцэтгэх захирал З.Батырбек танилцууллаа. Уг станцыг Баянгол дүүргийн 20 дугаар хорооны нутагт, ДЦС-2-оос 400 метрийн зайд барихаар төлөвлөсөн бөгөөд 300 мегаватт цахилгаан, 340 гигакалор/цаг дулаан үйлдвэрлэх хүчин чадалтай. Байгальд ээлтэй CFB технологитой, агаарын хөргөлттэй, олон шатлалт бохирдлын хяналттай шийдэл бүхий энэхүү төсөл нь DBFOM (зураг төсөл боловсруулах, барих, санхүүжүүлэх, ашиглах, засвар үйлчилгээ хийх) хэлбэрээр хэрэгжих юм.
Мөн Морингийн даваанд “хог шатааж эрчим хүч гаргах үйлдвэр” барихаар төлөвлөсөн бөгөөд өдөрт 1200-1500 тонн хогийг ангилан шатааж, эрчим хүч гаргах боломжтой талаар танилцуулав. НИТХ-ын төлөөлөгч З.Төмөртөмөө “ажлыг хойш тавилгүй шууд эхлүүлэх хэрэгтэй” гэдгийг онцолж, хог ангилахгүй бол байгальд хортой хог хаягдал их байгаа талаар байр сууриа илэрхийлсэн бол төлөөлөгч Д.Ихбаяр “хог ангилалтын нарийн зохион байгуулалт шаардлагатай” гэв.
Хуралдаанаар дараах асуудлуудыг хэлэлцэж, ээлжит бус VI хуралдаанд оруулахаар дэмжлээ:
-
“Дулааны V цахилгаан станц” төслийг төр, хувийн хэвшлийн түншлэлээр хэрэгжүүлэх талаар авах арга хэмжээ
-
“Хог шатааж эрчим хүч гаргах үйлдвэр” төслийг төр, хувийн хэвшлийн түншлэлээр хэрэгжүүлэх эрх олгох тухай
-
“Улаанбаатар 4 улирлын хүлэмж” төсөл хэрэгжүүлэх хуулийн этгээд байгуулах тухай
-
Хуулийн этгээд өөрчлөн байгуулах тухай (уламжлалт анагаах ухааны элэг судлалын клиник төв)
-
“Багахангайн мах боловсруулах үйлдвэр” ОНӨААТҮГ-ыг татан буулгах тухай
-
Төлөөлөн удирдах зөвлөлийн хараат бус гишүүдийг томилох, чөлөөлөх тухай
-
Сүм, хийдийн үйл ажиллагаа эрхлэх зөвшөөрлийн хугацааг сунгах тухай
Эх сурвалж: НИТХ-ХМОНХА
