Нийслэлийн ИТХ-ын дарга А.Баяр 2025 оны тавдугаар сарын 22-нд Туркийн “Монгол сан”-гийн ерөнхийлөгч Вейсэл Чифтци, “Ege Asfalt” компанийн ерөнхий зохицуулагч Ентүр Фатих болон албаны бусад төлөөллийг хүлээн авч уулзлаа. Уулзалтад мөн Нийслэлийн бодлогын судалгаа шинжилгээний төвийн захирал Р.Дагва оролцов.
Уулзалтын эхэнд А.Баяр Монгол, Туркийн харилцаа олон салбарт өргөжин хөгжиж буйг онцолж, нийслэл Улаанбаатар хотын түгжрэлийг бууруулах, дэд бүтцийг сайжруулах чиглэлд хамтын ажиллагааг эрчимжүүлэх боломжтойг тэмдэглэв. Харин “Ege Asfalt” компанийн ерөнхий зохицуулагч Ентүр Фатих Улаанбаатар хотын хөгжлийн хурдацтай байдалд талархан, зам гүүрийн бүтээн байгуулалтын төсөлд хамтрах сонирхлоо илэрхийлсэн байна.
Тус компани нь Турк Улсад зам, гүүр, төмөр зам, цэвэрлэх байгууламж зэрэг дэд бүтцийн салбарт тэргүүлэх 10 компанийн нэг бөгөөд түгжрэлийг бууруулах чиглэлээр ч амжилттай ажиллаж иржээ.
НИТХ-ын дарга А.Баярын хэлснээр, Улаанбаатар хотод түгжрэлийг бууруулах богино болон дунд хугацааны арга хэмжээний хүрээнд хэд хэдэн уулзварын дахин төлөвлөлт хийгдэж, олон түвшний уулзваруудыг шинээр байгуулахаар зорьж байгаа аж. Мөн зам тээврийн бусад бүтээн байгуулалтын ажлуудыг товч танилцууллаа.
Талууд цаашид зам, гүүрийн төсөл, түгжрэлийг бууруулах арга хэмжээний хүрээнд хамтран ажиллах, туршлага солилцох талаар санал нэгдэж, судалгаа шинжилгээг гүнзгийрүүлэхээр тохиролцлоо.
Эх сурвалж: НИТХ-ХМОНХА
