Улаанбаатар хотод хэрэгжих их багтаамжийн нийтийн тээврийн “Метро” төслийн бүтээн байгуулалтын гүйцэтгэгчийг сонгон шалгаруулж, гэрээ байгуулах ажлыг энэ оны хоёрдугаар улиралд багтаан хэрэгжүүлэхээр төлөвлөжээ. Үүний зэрэгцээ төслийн барилгын ажлыг эхлүүлэх бэлтгэлийг хангах шат эхэлсэн байна.

Төслийн хэрэгжилтийн явц, тулгамдаж буй асуудлуудын талаар НИТХ-ын ээлжит бус VI хуралдаанд Сэлбэ хот орон сууцжуулалтын төслийн захирал У.Баатар танилцуулав. Тэрбээр нийтийн тээврийн салбарт метро, трамвай, тусгай замын автобус, дүүжин зам, хөнгөн болон салбар төмөр зам зэрэг зургаан төрлийн тээврийн төсөл хэрэгжиж буйг онцлов. Мөн авто зам, гүүр, уулзварын чиглэлд шинэ тойрог зам, туулийн хурдны зам, олон түвшний уулзвар, “өөдөө тэмүүлэх” гүүр зэрэг томоохон бүтээн байгуулалт өрнөх болсныг дурдлаа.

Метро төслийн хүрээнд инженер, мэргэжилтэн бэлтгэх “2+2” хөтөлбөрийг хэрэгжүүлэхээр болж, ШУТИС болон БНСУ-ын Халла их сургуульд хоёр жилийн хугацаатайгаар оюутнуудыг сургаж, эхний ээлжинд хоёр зуун инженер бэлтгэхээр ажиллаж байна. Энэхүү хамтарсан хөтөлбөрийг Нийслэлийн Засаг даргын Тамгын газар, ШУТИС, “Духуа инженеринг” компанитай хамтран хэрэгжүүлж буй.

Түүнчлэн хот байгуулалт, орон сууцны чиглэлд сэлбэ хот, баянхошуу, ханын материал, хүннү хот зэрэг бүсүүдэд төсөл хэрэгжих бол эрчим хүчний салбарт дулааны тавдугаар цахилгаан станц, лаг болон хог шатаах үйлдвэр, баруун далай нүүрсний ордод түшиглэсэн цахилгаан станц зэрэг төсөл төлөвлөгдөж байна. Дэд бүтэц, усны менежментийн төслүүд ч мөн хөтөлбөрт багтжээ.

Гэхдээ эдгээр төслийг хэрэгжүүлэхэд:

• санхүүжилт шийдвэрлэх,

• газар чөлөөлөлт,

• хууль, эрх зүйн орчны боловсруулалт,

• норм, стандартын нутагшуулах ажил

• мөн метроны галт тэрэгний удирдлагын LTE-R системд зориулсан 700 MHz зурваст дээд, доод тус бүр арван MHz зурвасыг чөлөөлөх шаардлага байгааг онцолжээ.

Эх сурвалж: НИТХ-ХМОНХА