Гадаад харилцааны сайд Б.Батцэцэг Жакарта хотноо байрлах АСЕАН, Зүүн Азийн Эдийн засгийн судалгааны хүрээлэн (ERIA)-д зочилж, тус байгууллагын Ерөнхийлөгч Тэцүя Ватанабэтэй уулзалт хийв. Уулзалтын үеэр сайд Б.Батцэцэг бүс нутгийн уялдаа холбоо, эдийн засгийн интеграц, тогтвортой хөгжлийг дэмжих чиглэлд ERIA-ийн гүйцэтгэж буй үүргийг өндрөөр үнэлж, хамтын ажиллагаагаа өргөжүүлэх хүсэлтэй байгаагаа илэрхийллээ.

Тэрбээр ERIA-гаас санаачилсан “Цахим инновац, тогтвортой эдийн засгийн төв”, “Азид агаарын бохирдлыг бүрэн арилгах судалгааны төв”, “Эрчим хүчний судалгааны хүрээлэнгүүдийн сүлжээ”, “Төрийн удирдлагын сургууль” зэрэг хөтөлбөрүүдэд Монгол Улс хамтран оролцох сонирхолтой байгааг дурдсан юм.

ERIA-ийн Ерөнхийлөгч Тэцүя Ватанабэ Монгол Улсын тогтвортой хөгжлийн зорилтуудыг хэрэгжүүлэхэд тус хүрээлэн идэвхтэй хамтран ажиллахад бэлэн байгаагаа илэрхийлээд, өнгөрсөн хугацаанд хэрэгжүүлсэн хамтын ажиллагааны үр дүнг өндрөөр үнэлсэн байна.

Уулзалтын төгсгөлд хоёр тал бодлогын судалгаа, чадавх бэхжүүлэх, техникийн хамтын ажиллагааг өргөжүүлэх хүрээнд Монгол Улсын Гадаад харилцааны яам болон ERIA хооронд хамтран ажиллах Санамж бичигт гарын үсэг зурлаа.

АСЕАН болон Зүүн Азийн эдийн засгийн судалгааны хүрээлэнг (ERIA) 2008 онд байгуулсан бөгөөд Зүүн Азийн орнуудын эдийн засгийн өсөлт, бүс нутгийн түншлэлийг бэхжүүлэх зорилгоор бодлогын судалгаа хийж, шийдвэр гаргагч, эрдэмтэн судлаачид, иргэний нийгмийн оролцоог хангах хэлэлцүүлэг өрнүүлдэг байгууллага юм.

Эх сурвалж: Гадаад харилцааны яам