Бүгд Найрамдах Индонез Улсад албан ёсны айлчлал хийж буй Монгол Улсын Гадаад харилцааны сайд Б.Батцэцэг тус улсад оршин суугаа монгол иргэдийн төлөөллийг хүлээн авч уулзаж, санал солилцлоо.

Уулзалтын үеэр сайд Б.Батцэцэг Зүүн өмнөд Азийн орнууд, ялангуяа Индонез, Филиппин зэрэг улс орнуудтай харилцаа, хамтын ажиллагаагаа өргөжүүлэх нь чухал болохыг онцлоод, байгалийн цэвэр бүтээгдэхүүн, малын гаралтай түүхий эд, худалдаа, аялал жуулчлал, соёлын солилцооны боломжуудыг ашиглахын тулд эрх зүйн орчныг сайжруулах, визийн нөхцөлийг хөнгөвчлөх, агаарын шууд нислэг нээх талаар яриа хэлэлцээ хийж буйг танилцууллаа.

Иргэд Элчин сайдын яам дахин нээгдсэнд талархал илэрхийлж, харьцангуй цөөн монгол иргэн амьдарч байгаа ч хоёр орны харилцааг гүнзгийрүүлэх, ялангуяа эдийн засаг, аялал жуулчлал, соёлын салбарт хувь нэмэр оруулах хүсэлтэй байгаагаа илэрхийлсэн байна.

Сайд Б.Батцэцэг иргэддээ хандан, ЭСЯ-наас шаардлагатай туслалцаа авахын зэрэгцээ оршин суугаа орны хууль, соёл, ёс заншлыг хүндэтгэн сахих, монгол хэл, соёлоо хүүхдүүддээ өвлүүлэхэд анхаарч, Соёлын төвийн үйл ажиллагаанд идэвхтэй оролцохыг уриаллаа.

Уулзалтад оролцсон иргэдийн олонх нь эмэгтэйчүүд байсан бөгөөд тэд олон улсын байгууллага, үндэстэн дамнасан компани, сургуулиудад тэтгэлгээр суралцаж, хариуцлагатай алба хашиж буйг сайд онцолж, монголчуудын өндөр чадвар, нэр хүндийг илэрхийлсэн бахархалтай жишээ хэмээн тэмдэглэн, тэдний ажил амьдралд амжилт хүсэв.

Эх сурвалж: Гадаад харилцааны яам