МАН-ын Бага хурал өчигдөр өглөө үүр цүүрээр өндөрлөж, АН-ыг Хамтарсан засгаас гаргах болсноо мэдэгдсэн. Ингэхдээ АН-ын УИХ дахь бүлгийн зарим гишүүд гэрээгээ зөрчсөн гэж мэдэгдсэнээс гадна "намын анхан, дунд шатнаас ирүүлсэн шаардлагаар" гэж мэдэгдсэн. Харин тэр "анхан, дунд шатны шаардлага" гэгчийг нь тодруулбал, Бага хурлын гишүүдийн зүгээс "Хяналт, үнэлгээний Үндэсний хорооны дарга Э.Одбаяр гэдэг нөхөр орон нутагт ажил хийлгэхээ болилоо" гэдэг гомдлыг тавьсан байна. Тиймээс энэ асуудлаар Монгол Улсын сайд, Хяналт, үнэлгээний Үндэсний хорооны дарга Э.Одбаяр дараах байр суурийг илэрхийлсэн байна. 

Э.Одбаяр: 

-"Засгийн газрын кабинет 23 сайдтай, найман сайд Ардчилсан намаас томилогдсон. Хяналт, тэнцэл гэдэг зүйлийг Засгийн газарт хэрэгжүүлэхээр АН-аас томилогдсон сайдууд хичээн ажилласан. МАН-ын Бага хурлын үеэр хамтарсан Засгийн газар байгуулсан намын гишүүд гэрээгээ удаа дараа зөрчсөн гэж мэдээлсэн. Тэр хамтарсан Засгийн газрын гэрээнд тус тусын намын мөрийн хөтөлбөрт суусан тодорхой ажлуудыг хэрхэн хэрэгжүүлэх вэ гэдэг үйл ажиллагааны төлөвлөгөөний тухай асуудлыг тусгаснаас бие биенийхээ алдаа дутагдлыг хараад, дуугүй, загас шиг байх тухай тусгаагүй. Өөр шалтаг шалтгаан байсан байх. Гишүүд, дэмжигчдийн тоогоороо МАН болон АН зөрүү багатай. Улс төрийн хоёр том намын хувьд Үндсэн хуулиар олгосон үүргээ биелүүлж, хариуцлагаа хүлээгээд явсан гэж ойлгож байна

Анх кабинет бүрдэхдээ ЗГХЭГ-ын харьяа байсан Хяналт хэрэгжүүлэх газрыг Засгийн газар дахь Хяналтын тухай хуулийн дагуу тусад нь бие даасан сайдтай болгож, миний бие ажилласан. Төрийн хууль тогтоомжийн биелэлтийг хянах ажлыг алба хаагчид хийж хэрэгжүүлдэг. Энэ явцад олон хүний эрх ашиг хөндөгдсөн байхыг  үгүйсгэхгүй. Ерөнхий сайдын хувьд дотоод хяналт тэнцлийг зөв хангах үүднээс хууль зүйн сайд, хяналтын сайдаараа сөрөг хүчний намаас томилсон гэж ойлгодог. Тэр ажлаа О.Алтангэрэл чамгүй сайн хийж, зориглон олон хуулийн шинэчлэлийг УИХ-д өргөн барьсан.

Бид одоо хэрсүү байх ёстой. Ардчилсан нам эв нэгдлээ бэхжүүлэх ёстой. Зөвхөн Засгийн газрын асуудал бус засаглалын тухай асуудал хөндөгдөх вий гэж болгоомжилж байна. Илүү хэрсүү байж, эрүүл зөв шүүмжлэл, хэлэлцүүлгийг илүү их өрнүүлж, ард түмнийхээ тусгалыг парламентын танхим руу оруулж ирэх ёстой. Хяналтын менежерийн тухай асуудал бол төрийн өмчит компаниудад хяналт тавьж, хэмнэлт хийх үндсэн дээр мэргэжлийн хүмүүсийг томилсон" гэв.