Монгол Улсын Гадаад харилцааны сайд Б.Батцэцэг АСЕАН-ы Ерөнхий нарийн бичгийн дарга, доктор Као Ким Хорнтой уулзаж, хоёр талын хамтын ажиллагааны талаар санал солилцлоо.
Уулзалтын үеэр сайд Б.Батцэцэг Монгол Улс 2005 онд АСЕАН-ы Энх тайван, найрсаг харилцааны гэрээнд нэгдсэнээс хойш харилцаа тогтвортой хөгжиж ирснийг тэмдэглээд, ирэх 2025 онд уг гэрээнд нэгдсэний 20 жилийн ой тохиохыг онцлов. Тэрбээр Монгол Улс АСЕАН-тай улам ойртон, хамтын ажиллагааны институцын хэлбэрийг өргөжүүлэхэд өндөр ач холбогдол өгдөг бөгөөд Салбарын яриа хэлэлцээний түнш болохоос гадна Зүүн Азийн дээд түвшний уулзалтад оролцох эрмэлзэлтэй байгаагаа дахин илэрхийлсэн байна.
АСЕАН-ы Ерөнхий нарийн бичгийн дарга Као Ким Хорн Монгол Улсын АСЕАН-тай хөгжүүлж буй харилцааг өндрөөр үнэлж буйгаа илэрхийлээд, тус байгууллагын нарийн бичгийн дарга нарын газар Монгол Улстай хамтарсан судалгаа, сургалтын хөтөлбөр хэрэгжүүлэх, харилцан ашигтай хамтын ажиллагааг хөгжүүлэхэд бэлэн гэдгээ мэдэгдэв.
Гадаад харилцааны яамны мэдээлснээр, Монгол Улс бүс нутгийн энх тайван, тогтвортой байдал, хамтын хөгжил дэвшлийг дэмжих зорилтын хүрээнд уур амьсгалын өөрчлөлт, хүнсний аюулгүй байдал, цахим шилжилт, гамшгийн эрсдэлийн менежмент, бүс нутгийн уялдаа холбоо, хөдөө орон нутгийн эмэгтэй удирдагчдыг чадавхжуулах, байгаль орчны боловсрол зэрэг чиглэлд АСЕАН-тай идэвхтэй хамтран ажиллах зорилготой байна.
Эх сурвалж: Гадаад харилцааны яам
