Монгол Улсын Их Хурлын дарга Д.Амарбаясгалан өнөөдөр Япон Улсын Ерөнхий сайд агсан Абэ Шинзогийн гэргий, Японы нийгмийн хөгжлийг дэмжих сангийн тэргүүн хатагтай Абэ Акиэг хүлээн авч уулзлаа.
Хатагтай Абэ Акиэ УИХ-ын Тамгын газар, НҮБ болон Солонгосын олон улсын хамтын ажиллагааны байгууллага “КОЙКА”-гаас хамтран зохион байгуулж буй “Бид эмэгтэйчүүд” чуулга уулзалтад оролцож байна. Энэхүү арга хэмжээ энэ сарын 21-22-ны өдрүүдэд болж буй юм.
Япон Улсын Ерөнхий сайд агсан Шинзо Абэ Монгол, Японы харилцаанд онцгой анхаарал хандуулж, манай улсад гурван удаа айлчилсан бөгөөд энэ нь хоёр орны гадаад харилцааны түүхэнд тэмдэглэгдэх чухал үйл явдал болсон билээ.
Хатагтай Абэ Акиэ Монгол Улсад өмнө нь хоёр удаа зочилж байсан ба цаашид ч хоёр орны найрсаг харилцаа, хамтын ажиллагааг бэхжүүлэхэд хувь нэмрээ оруулна гэдэгт итгэлтэй байгаагаа уулзалтын үеэр онцолсон байна.
Эх сурвалж: УИХ-ын Хэвлэл мэдээллийн алба
