Америкийн спорт хувцас, гутлын тэргүүлэгч үйлдвэрлэгч “Nike” компани 2025 оны зургаадугаар сарын 1-нээс эхлэн зарим бараа бүтээгдэхүүнийхээ үнийг нэмэх шийдвэр гаргаснаа мэдэгдлээ. Энэ нь тус компанийн улирлын төлөвлөгөөний хүрээнд хийгдэж буй алхам бөгөөд дэлхийн зах зээл дэх тогтворгүй нөхцөл байдал, үйлдвэрлэлийн зардал нэмэгдсэнтэй холбоотой хэмээн тайлбарласан ч АНУ-ын Ерөнхийлөгч Дональд Трампын худалдааны бодлогын талаар тайлбар хийгээгүй байна.

Nike-ийн шинэ үнэт бодлогоор 100 ам.доллароос дээш үнэтэй ихэнх пүүзний үнэ 10 ам.доллар хүртэл нэмэгдэх бол спортын хувцас, хэрэгслийн үнийг 2-10 ам.доллараар өсгөхөөр төлөвлөжээ. Гэхдээ “Air Force 1” загварын пүүз, 100 ам.доллароос доош үнэтэй гутал, хүүхдийн бүтээгдэхүүн болон “Jordan” брэндийн хувцас, дагалдах хэрэгслийн үнэ өөрчлөгдөхгүй юм.

Түүнчлэн Nike компани 2019 оноос хойш анх удаа “Amazon” цахим худалдааны платформоор бүтээгдэхүүнээ шууд борлуулах гэж буйгаа зарласан нь хэрэглэгчдэд илүү өргөн хүрээний хүртээмжтэй байдал бий болгох алхам хэмээн үзэж байна.

Өнгөрсөн сард Nike-ийн өрсөлдөгч “Adidas” компани мөн АНУ-ын импортын татварын бодлого нь бүтээгдэхүүний үнэ өсөхөд нөлөөлж буй талаар мэдэгдэж, алдартай “Gazelle” болон “Samba” загваруудын үнэ нэмэгдэхийг анхааруулсан билээ.

Д.Трампын “харилцан татвар” ногдуулах шийдвэрийг дөрөвдүгээр сарын 2-нд зарласан ч хэрэгжилтийг 90 хоногоор хойшлуулсан байгаа бөгөөд энэ хугацаа долоодугаар сарын эхээр дуусах юм. Худалдааны бодлогын энэ тодорхойгүй байдал нь дэлхийн компаниудын бизнес төлөвлөгөөнд эрсдэл дагуулсаар байна.

Эх сурвалж: BBC