Улсын Их Хурлын Аж үйлдвэржилтийн бодлогын байнгын хороо өнөөдөр (2025.05.22) “Монгол Улсын хөгжлийн 2026 оны төлөвлөгөө батлах тухай” Улсын Их Хурлын тогтоолын төслийн хоёр дахь хэлэлцүүлгийг хийв. Хэлэлцүүлгийн үеэр гишүүд асуулт асууж, үг хэлээгүй бөгөөд УИХ-ын гишүүн С.Бямбацогтын гаргасан хөнгөн үйлдвэрийн экспортыг дэмжих зарчмын зөрүүтэй саналыг олонх дэмжсэнгүй. Тогтоолын төслийн хоёр дахь хэлэлцүүлгийг Эдийн засгийн байнгын хороонд хүргүүлэхээр болов.

Хуралдааны дараагийн хэсэгт хил орчмын худалдаа, бүс нутгийн аж үйлдвэр, эдийн засгийн хамтын ажиллагааны талаар Тэргүүн шадар сайд болон холбогдох яамдын мэдээллийг сонслоо. Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн хоёр талт хамтын ажиллагаа, хорио цээрийн протокол шинэчлэх ажлууд, экспортын боомтын чадавхыг нэмэгдүүлэх талаар мэдээлэв. Малын гаралтай дайвар бүтээгдэхүүн, ноос ноолуурын экспорт, вакцины хамтын ажиллагааны тухай мэдээллийг тэрбээр онцолсон юм.

Эдийн засаг, хөгжлийн яамны газрын дарга Б.Анар Хятад, Орос зэрэг улстай хамтын ажиллагааг өргөжүүлэх олон талт хөтөлбөрүүд, хөрөнгө оруулалтын хүрээнд хэрэгжүүлж буй ажлуудыг танилцуулж, “Баогийн чуулга уулзалт”, төмөр замын бүтээн байгуулалт, эдийн засгийн коридор, БНСУ болон Евро-Азийн эдийн засгийн холбоотой хэлэлцэж буй гэрээ хэлэлцээрийн талаар дэлгэрэнгүй танилцуулсан байна.

Сангийн яамны газрын дарга Ж.Дэлгэржаргал Хятадын хөнгөлөлттэй зээлийн хүрээнд хэрэгжиж буй төслүүд, бүс нутгийн хамтын ажиллагааны санхүүжилтийн талаар мэдээлсэн бол УИХ-ын гишүүн Д.Үүрийнтуяа хөрөнгө оруулалтын тоон мэдээлэл дутуу байгааг анхааруулж, үнэлгээ хийх боломжгүй гэж мэдэгдэв.

Байнгын хорооны дарга С.Ганбаатар хэлэлцүүлгийг дүгнэхдээ салбаруудын уялдааг хангах, бодлогын дэмжлэг үзүүлэх үүднээс ажлын хэсэг байгуулж, УИХ-ын 2025 оны намрын чуулганд санал дүгнэлтээ танилцуулах үүрэг өглөө. Ажлын хэсгийг даргалахаар С.Ганбаатар, гишүүдээр М.Бадамсүрэн, П.Ганзориг, Д.Жаргалсайхан, Б.Тулга, Х.Жангабыл нарыг томилсон байна.

Мөн энэ өдөр өмнө нь дөрөвдүгээр сарын 30-нд гаргасан 09 дүгээр тогтоолын дагуу мега төслүүдийн хэрэгжилтэд хяналт тавих, бодлогын дэмжлэг үзүүлэх зорилготой өөр нэг ажлын хэсгийн удирдамжийг хэлэлцэн баталлаа. Уг ажлын хэсгийг УИХ-ын гишүүн Д.Үүрийнтуяа ахалж буй бөгөөд хэлэлцүүлгийн үр дүнг намрын чуулганд танилцуулах чиглэл өгчээ.

Эх сурвалж: Улсын Их Хурлын Хэвлэл мэдээллийн алба