МАН-ын VI Бага хурал 2025 оны тавдугаар сарын 21-нд болж, тус хурлын шийдвэрийг өнөөдөр албан ёсоор танилцууллаа. МАН-ын Ерөнхий нарийн бичгийн дарга Я.Содбаатар мэдээлэхдээ, хуралдаанаар МАН-ын дарга, Монгол Улсын Ерөнхий сайд Л.Оюун-Эрдэнийн улс төрийн илтгэлийг хэлэлцэж, түүнтэй холбоотойгоор 40 гаруй гишүүн асуулт тавьж, өргөн хэлэлцүүлэг өрнүүлсэн болохыг онцоллоо.
Хэлэлцүүлгийн үр дүнд МАН-ын анхан, дунд шатны гишүүдээс гарсан шүүмжлэл, байр суурийг үндэслэн “Шинэ сэргэлтийн бодлого” болон Бүсчилсэн хөгжлийн мөрийн хөтөлбөр”-ийг хамтарсан Засгийн газарт хамтрагч улс төрийн намгүйгээр үргэлжлүүлэх шийдвэрийг Бага хурал олонхийн саналаар баталсан байна. Энэхүү шийдвэр нь Засгийн газарт хамтарч ажиллах гэрээг зөрчсөн улс төрийн намыг цаашид оролцуулахгүй байх агуулгатай тогтоол юм.
МАН-ын зүгээс энэ шийдвэрийг хамтарсан Засгийн газарт орж ажиллаж буй бусад улс төрийн намуудад танилцуулж, Бодлогын зөвлөлд хэлэлцүүлэх албан ёсны шатанд шилжүүлэхээ мэдэгдсэн. Энэ нь хамтарсан Засгийн газрын бүтэц, бүрэлдэхүүнд өөрчлөлт орох магадлалыг бий болгож байгаа юм.
Одоогийн байдлаар хамтарсан Засгийн газарт:
-
МАН-аас 12 сайд
-
АН-аас 8 сайд
-
ХҮН намаас 2 сайд ажиллаж байгаа билээ.
МАН-ын энэ удаагийн шийдвэр нь улс төрийн нөхцөл байдлыг өөрчлөх, хамтарсан засаглалын цаашдын хувь заяаг тодорхойлох чухал суурь болж байна.
Эх сурвалж: МАН-ын Ерөнхий нарийн бичгийн даргын мэдээлэл
