Монгол Улсын Гадаад харилцааны сайд Б.Батцэцэг болон Бүгд Найрамдах Индонез Улсын Гадаад хэргийн сайд Сугионо нар 2025 оны тавдугаар сарын 21-ний өдөр албан ёсны хэлэлцээ хийж, хоёр орны хамтын ажиллагааг өргөжүүлэх өргөн хүрээний асуудлаар санал солилцлоо.

Хоёр улсын найрсаг харилцаа 70 жилийн босгон дээрээ ирж буй энэ үед түүхэн ойг тэмдэглэх хүрээнд улс төр, эдийн засаг, соёл урлагийн хамтарсан үйл ажиллагаа зохион байгуулах, харилцааны түвшинг шат ахиулах зорилт тавьсныг сайд Б.Батцэцэг онцоллоо.

Хэлэлцээний үеэр Индонез Улс Монголын нийслэл Улаанбаатар хотноо Элчин сайдын яамаа нээх шийдвэр гаргаснаа албан ёсоор мэдэгдсэн нь хоёр орны харилцаанд шинэ хуудас нээж буй чухал алхам болов. Мөн хоёр тал худалдаа, эдийн засгийн хамтын ажиллагаагаа гүнзгийрүүлэх хүрээнд Монголын ноос, ноолуур, арьс ширэн бүтээгдэхүүн, Индонезийн гар урлал, нэхмэл эдлэл зэргийг харилцан зах зээлд нийлүүлэх талаар тохиролцсон байна.

Сайд Б.Батцэцэг хоёр орны хооронд агаарын шууд тээврийн хэлэлцээр байгуулах, эрх зүйн зохицуулалтыг бүрдүүлэх саналыг дэвшүүлж, индонезийн тал талархан хүлээн авлаа. Үүнээс гадна мал эмнэлгийн салбар дахь хамтын ажиллагаа, Монголын халал аргаар бэлтгэсэн мах, махан бүтээгдэхүүнийг Индонезийн зах зээлд нийлүүлэх талаар бодит дэмжлэг үзүүлэхээ талууд илэрхийлсэн.

Иргэд хоорондын харилцааг гүнзгийрүүлэхийн тулд боловсрол, соёл, спортын солилцоо, музейн хамтын ажиллагаа, аялал жуулчлалын хоёр урсгалт байдал зэрэг чиглэлээр хамтран ажиллахын зэрэгцээ визийн шаардлагаас харилцан чөлөөлөх асуудлыг ч хөндсөн нь ирээдүй рүү чиглэсэн томоохон хүлээлтийг бий болгож байна.

Индонезийн Гадаад хэргийн сайд Сугионо Монголын оюутнуудад Засгийн газрын тэтгэлэгт хөтөлбөрөөр суралцах боломж олгох, залуу боловсон хүчнийг чадавхжуулах чиглэлээр боловсролын салбарын хамтын ажиллагааг тэлэхээ илэрхийллээ.

Талууд НҮБ болон олон улсын байгууллагын хүрээнд хамтын ажиллагаагаа бэхжүүлэхээ нотолж, Индонез Улс Монголын АСЕАН-тай харилцах санаачилгыг дэмжин ажиллахыг илэрхийлэв. Мөн энэ онд Улаанбаатарт болох FEALAC форумд Сугионо сайд оролцохоо баталгаажуулж, Улаанбаатарын яриа хэлэлцээний олон улсын 10 дугаар бага хурлыг дэмжихээ мэдэгдлээ.

Эх сурвалж: Гадаад харилцааны яам