Булган аймгийн Засаг дарга Д.Пүрэв-Очироор ахлуулсан ажлын хэсэг “Булганы сэргэлт” үйл ажиллагааны хөтөлбөрийн хүрээнд аймгийнхаа бүх сумыг тойрон ажиллаж буй бөгөөд өнөөдөр Баяннуур суманд ажиллалаа. Ажлын хэсгийн зорилго нь иргэдэд хэрэгжүүлж буй бодлого, үйл ажиллагааг танилцуулахын зэрэгцээ төрийн байгууллагын нөхцөл байдалтай газар дээр нь танилцаж, шийдвэрлэвэл зохих асуудлыг тодорхойлох явдал байв.

Баяннуур сумын цэцэрлэг нь 80 хүүхдийн багтаамжтай хэдий ч өнөөдрийн байдлаар 134 хүүхдэд сургуулийн өмнөх боловсрол олгож байгаа нь багтаамжаас хэтэрсэн нөхцөл үүссэнийг хөндлөө. Мөн 1.6 тэрбум төгрөгийн төсөвт өртөгтэй, 120 хүүхдийн багтаамжтай сургуулийн өргөтгөлийн барилгын явцыг шалгаж, гүйцэтгэгч байгууллагад ажил эрчимжүүлэх хугацаатай үүрэг өгсөн байна.

Түүнчлэн сумын худгийн ус цэвэршүүлэгч төхөөрөмжийг 2026 оны улсын төсөвт тусгах, ЗДТГ-ын шинэ барилгын зураг төсөв боловсруулах, цэцэрлэгийн өргөтгөлийн асуудлыг шийдвэрлэх талаар холбогдох байгууллагуудад үүрэг чиглэл өгчээ.

Ажлын хэсгийн бүрэлдэхүүнд орсон Нийгмийн бодлогын хэлтэс, Боловсролын газар, Хөдөлмөр, халамжийн байгууллагын мэргэжилтнүүд сумын “Зөв” өрхийн гишүүд, багийн Засаг дарга нар, сургуулийн нийгмийн ажилтан, даатгалын байцаагч нартай уулзалт хийж, төрөөс хэрэгжүүлж буй бодлого, арга хэмжээг танилцуулан санал хүсэлтийг нь сонссон байна. Мөн амьжиргааг дэмжих хөтөлбөрийн хүрээнд өрхийн гишүүдийн нөхцөл байдлыг үнэлж, яаралтай хэрэгжүүлэх арга хэмжээг сумын нийгмийн ажилтан болон багийн удирдлагад чиглэл болгожээ.

Уулзалтын дараа ажлын хэсэг малчдын төлөөлөл болох Б.Баяндалай, О.Наранцогт нарын хотонд очиж ажилласан байна. Одоогийн байдлаар Баяннуур сум нийт 463 малчин өрхийн 77553 толгой мал өвөлжүүлж хаваржуулсан бөгөөд 29325 төл мал хүлээн аваад байна. Малчид “Шинэ хоршоо” хөдөлгөөний хүрээнд олгосон зээлийг ашиглан малын хорогдлыг нөхөн авч, техник, тоног төхөөрөмж худалдан авч ашиглаж байгаагаа танилцуулжээ.

Эх сурвалж: Булган аймгийн ЗДТГ