Монгол Улсын Ерөнхийлөгч Ухнаагийн Хүрэлсүх 2025 оны тавдугаар сарын 21-ний өдөр Нэгдсэн Үндэстний Байгууллагын Монгол Улс дахь Суурин зохицуулагч Яап Ван Хиердэнийг хүлээн авч уулзав.

Ерөнхийлөгч уулзалтын эхэнд ноён Ван Хиердэнийг үүрэгт ажилдаа амжилттай орсонд нь баяр хүргээд, Монгол Улс болон НҮБ-ын хоорондын өргөн хүрээтэй харилцаа, хамтын ажиллагаа цаашид ч гүнзгийрч, үр дүнтэй өрнөнө гэдэгт итгэлтэй байгаагаа илэрхийллээ. Тэрбээр НҮБ нь манай улсын нийгэм, эдийн засгийн хөгжилд тууштай дэмжлэг үзүүлж ирсэнд талархаж, Монгол Улс тус байгууллагатай хөгжүүлж буй хамтын ажиллагаандаа өндөр ач холбогдол өгдгийг онцлон тэмдэглэв.

Ноён Ван Хиердэн Монгол Улсыг амар амгалан, түүх соёл, байгаль дэлхий, энх тайвныг эрхэмлэгч үнэт зүйлээрээ олон улсад манлайлж буй улс гэж үзэж байгаагаа хэллээ. Тэрээр НҮБ-ын Суурин зохицуулагчаар томилогдон ажиллахад хамгийн таатай, боломж ихтэй орнуудын нэг нь Монгол Улс хэмээн тодотгов.

Уулзалтын үеэр хоёр тал дэлхий нийтэд тулгарч буй байгаль орчин, уур амьсгалын өөрчлөлтийн асуудалд Монгол Улс идэвхтэй хувь нэмэр оруулж буйг дурдаж, 2026 онд Монгол Улсад зохион байгуулагдах “Цөлжилттэй тэмцэх тухай НҮБ-ын конвенцын Талуудын 17 дугаар бага хурал”-д амжилт хүсэв. Мөн Ерөнхийлөгчийн санаачилсан “Тэрбум мод”, “Цагаан алт”, “Эрүүл монгол хүн” зэрэг үндэсний хөдөлгөөнүүдийг НҮБ үргэлжлүүлэн дэмжин ажиллана гэдгийг илэрхийллээ.

Талууд уулзалтын үеэр Монгол Улсын тогтвортой хөгжлийн дунд болон урт хугацааны бодлого, зорилтыг НҮБ-ын Тогтвортой хөгжлийн зорилгуудтай уялдуулах, бүхий л түвшинд идэвхтэй хамтран ажиллах талаар санал солилцсон байна.

Эх сурвалж: Монгол Улсын Ерөнхийлөгчийн Тамгын газар