Улсын Их Хурлын дарга Д.Амарбаясгаланд өнөөдөр Ерөнхий сайд Л.Оюун-Эрдэнэ, Тэргүүн шадар сайд Л.Гантөмөр, Шадар сайд Т.Доржханд, Хууль зүй, дотоод хэргийн сайд О.Алтангэрэл нар “Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай” хуулийн төсөл болон холбогдох бусад хуулийн төслүүдийг өргөн барилаа.

Хуулийн төслийн гол зорилго нь авлига, мөнгө угаахтай холбоотой гэмт хэргийн шалтгаан, үр дагаврыг хууль зүйн үүднээс илүү тодорхой болгож, хууль бус хөрөнгө орлогыг улсын мэдэлд буцаан авч, төрд учирсан хохирлыг нөхөн төлүүлэх эрх зүйн орчинг бүрдүүлэхэд чиглэж байгаа юм. Одоогийн нөхцөлд эдгээр гэмт хэргийг тодорхойлох, хохирлыг барагдуулах, хөрөнгийг хадгалах, захиран зарцуулах болон түүний хяналт, үр ашигтай байдал хангалтгүй байгааг Засгийн газар онцолжээ.

Хуулийн төсөлд нийтийн албан тушаалтан гэмт хэрэг үйлдэж олсон хөрөнгийг зөвхөн эрүүгийн хэрэг биш, иргэний журмаар ч нэхэмжлэх боломжийг бүрдүүлэх зохицуулалт тусгагдсан. Энэ нь зөвхөн хууль сахиулах байгууллагын хүрээнд төдийгүй иргэд, төрийн бус байгууллагын оролцоотойгоор ч хууль бус хөрөнгийг илрүүлж, буцаан авах боломжийг нээж байгаа аж.

Түүнчлэн уг төсөл батлагдсанаар:

• Авлигын эсрэг хууль тогтоомж илүү тодорхой, хэрэгжихүйц болно

• Төсвийн хөрөнгө, нийгмийн баялаг хууль бусаар алдагдахаас сэргийлнэ

• Хураан авсан хөрөнгийг олон нийтийн сайн сайхны төлөө ашиглах нөхцөл бүрдэнэ

• Шүгэл үлээгчдийн эрхийг хамгаалах, нууцлах, урамшуулах тогтолцоо бүрдэнэ

Засгийн газрын зүгээс энэхүү хуулийн төслийг шударга ёсыг бэхжүүлэх, нийгмийн итгэлцлийг сэргээх, хууль бус үйлдэлд хариуцлага тооцдог, үр дагавартай системийг бүрдүүлэх зорилгоор боловсруулсан гэж мэдэгдсэн байна.

Эх сурвалж: УИХ-ын Хэвлэл мэдээллийн алба