Монгол Улсын Их Хурлын дарга Д.Амарбаясгалан “Бид эмэгтэйчүүд” чуулганы нээлтэд хэлсэн үгэндээ эмэгтэйчүүдийн орон нутгийн түвшин дэх оролцоо, манлайллыг бодлогын түвшинд дэмжих шаардлагыг онцоллоо. Тэрбээр энэхүү чуулганыг зөвхөн эмэгтэйчүүдийн эрхийн асуудлаар хязгаарлахгүй, харин тэднийг шийдвэр гаргах шатны бодлогын хэрэгжилтэд оролцуулах, нийгмийн бүх бүлгийн дуу хоолойг төрд хүргэх өргөн хүрээний зорилготой болохыг тодотгов.

Түүний мэдээлснээр, 2024 оны УИХ-ын сонгуульд эмэгтэй нэр дэвшигчдийн тоо түүхэндээ анх удаа 38.7 хувьд хүрч, 32 эмэгтэй гишүүн сонгогдон, парламент дахь төлөөлөл 25.4 хувь болсон. Ази тивд парламент дахь эмэгтэйчүүдийн оролцоогоороо Монгол улс тэргүүлж эхэлжээ. Энэ бол сонгуулийн хуулинд эмэгтэйчүүдийн квотыг 30 хувь болгосон зоримог өөрчлөлтийн үр дүн хэмээн тодотголоо.

Гэвч орон нутгийн шийдвэр гаргах түвшинд эмэгтэйчүүдийн оролцоо сул хэвээр байгаа нь түүний хэлсэн үгийн гол агуулга байв. Аймаг, нийслэлийн ИТХ-ын дарга нарын гурав, дүүргийн ИТХ-ын даргын нэг, 330 сумын ИТХ-ын даргын 41 нь л эмэгтэй төлөөлөгч байна. Засаг даргын түвшинд ч эмэгтэйчүүдийн тоо хязгаарлагдмал байгаа нь Жендэрийн эрх тэгш байдлын тухай хууль хэрэгжихгүй байгаагийн илрэл хэмээн тэр дүгнэв.

Мөн эмэгтэйчүүдийн улс төрийн оролцоог нэмэгдүүлэхийн тулд:

• Квот, сургалт, сүлжээ бүхий бодлогын дэмжлэгийг тогтмолжуулах

• Орон нутгийн байгууллагууд бодлогоор дэмжих

• Хөгжлийн бэрхшээлтэй болон хөдөө орон нутгийн эмэгтэйчүүдийн оролцоог бодитой нэмэгдүүлэх шаардлагатайг онцолсон юм.

Тэрбээр парламентын зүгээс “Нээлттэй парламент”, “Эксперт”, “Эмэгтэй бизнес эрхлэгчдийн санхүүгийн код” зэрэг хөтөлбөрийг санаачлан хэрэгжүүлж эхэлснийг дурдсан бөгөөд өнөөдрийн чуулганаас гарсан санал, шийдвэр дээр үндэслэн тусгай хөтөлбөр боловсруулахаа илэрхийлсэн. Мөн олон улсын байгууллагуудтай хамтран хэрэгжүүлсэн жендэрийн оролцооны хөтөлбөрүүд бодит үр дүн авчирсныг тэмдэглэсэн байна.

Түүний хэлснээр, эмэгтэйчүүд оролцсон орчин бүр илүү хүртээмжтэй, ажил хэрэгч болж чаддаг. Энэ итгэл дээр тулгуурлан хамтдаа өөрчлөлт хийх уриалга дэвшүүлж, чуулганд оролцогчдод амжилт хүслээ.

Эх сурвалж: УИХ