Авлигатай тэмцэх үндэсний хөтөлбөрийн 2024 оны хэрэгжилтэд хийсэн хяналт-шинжилгээ, үнэлгээний дүнгээр Сонгуулийн ерөнхий хороо Улсын Их Хурлын дэргэдэх байгууллагуудын дундаас хамгийн өндөр үнэлгээ авч, тэргүүлжээ. Энэ талаар Засгийн газрын Хэрэг эрхлэх газар, Авлигатай тэмцэх газар хамтран нэгдсэн тайлан гаргаж, хөтөлбөрийн хэрэгжилт, үр дүнг Хууль зүйн байнгын хороонд танилцуулсан байна.
Хөтөлбөрийн хүрээнд Сонгуулийн ерөнхий хороо нь нам, эвсэл, нэр дэвшигчдийн санхүүгийн тайланг ил тод, нээлттэй мэдээлэх, сонгуулийн зардлыг бууруулах, тайлан өгөөгүй этгээдүүдэд хариуцлага тооцох эрх зүйн орчныг сайжруулах ажлыг амжилттай хэрэгжүүлсэн байна. Мөн олон нийтийг мэдээллээр хангах, иргэдийн хяналт, оролцоог нэмэгдүүлэх, сонгогчдын боловсрол, эрх зүйн мэдлэгийг дээшлүүлэх зорилт хангалттай хэрэгжсэн гэж үнэлэгджээ.
Түүнчлэн гадаадад оршин суугаа сонгогчдын эрхийг хангах, залуус болон эмэгтэйчүүдийн улс төрийн оролцоог нэмэгдүүлэх чиглэлээр хийсэн ажлууд хөтөлбөрийн төлөвлөгөөтэй нийцсэн гэж дүгнэсэн байна. Ажлын хэсгийн үнэлгээгээр Авлигатай тэмцэх үндэсний хөтөлбөрт тусгасан 6 үндсэн зорилгын хүрээнд 20 зорилтыг нийтдээ 92 хувийн биелэлттэй хэрэгжүүлжээ.
Уг хөтөлбөр нь Монгол Улсын Их Хурлын 2023 оны 59 дүгээр тогтоолоор батлагдан, 2030 он хүртэл хэрэгжихээр төлөвлөгдсөн юм.
Эх сурвалж: Засгийн газрын хэвлэл мэдээлэл, олон нийттэй харилцах газар
