Засгийн газрын 2025 оны тавдугаар сарын 21-ний ээлжит хуралдаанаар Гэр бүл, хөдөлмөр, нийгмийн хамгааллын яамны харьяа Хөдөлмөр, нийгмийн хамгааллын сургалт, үнэлгээ, судалгааны институтын бүтэц, чиг үүргийг шинэчлэн “Хүн ам, хөдөлмөр, нийгмийн хамгааллын сургалт, судалгааны хүрээлэн” нэртэй эрдэм шинжилгээний байгууллага болгон өөрчлөх шийдвэр гаргалаа.

Энэхүү хүрээлэн нь хөдөлмөр эрхлэлт, хөдөлмөрийн зах зээл, хөдөлмөрийн аюулгүй байдал, эрүүл ахуй, цалин хөлс, хүний нөөцийн хөгжил зэрэг салбарт шинжилгээ, судалгаа хийхээс гадна салбарын ажилтнуудын мэргэшлийг дээшлүүлэх сургалт явуулах чиг үүрэгтэйгээр үйл ажиллагаагаа явуулах юм. Цаашид зарим чиг үүргийг холбогдох хууль тогтоомжийн дагуу шилжүүлж, байгууллагын бүтцийн өөрчлөлт хийгдэхээр болжээ.

Шинэ бүтэцтэйгээр ажиллах тус хүрээлэн нь салбарын их өгөгдөлд тулгуурласан нэгдсэн мэдээллийн санг бүрдүүлж, бодлогын судалгаа, шинжилгээг үндэслэлтэй, өгөгдөлд суурилсан байдлаар боловсруулах чиг үүргийг хэрэгжүүлэхээр төлөвлөсөн байна. Үүнд хөдөлмөрийн зах зээлийн эрэлт, нийлүүлэлтийн төлөвлөлт, дээд боловсрол, мэргэжлийн боловсролын уялдаа холбоог сайжруулах, бодлогын зөвлөмж гаргах, цахим болон технологийн хэрэглээний судалгаа хийх зэрэг ажлууд багтаж байгаа юм.

Шинэчилсэн бүтэц нь байгууллагын орон тоог нэмэгдүүлэхгүй бөгөөд эсрэгээрээ зардлыг 30 орчим хувиар хэмнэхээр тооцоолсон байна.

Эх сурвалж: Засгийн газрын хэвлэл мэдээлэл, олон нийттэй харилцах газар