Засгийн газрын ээлжит хуралдаан 2025 оны тавдугаар сарын 21-ний өдөр болж, “Нийтийн албан тушаалтны хууль бус хөрөнгийг хураан авах, нөхөн төлүүлэх тухай” хуулийн төслийг хэлэлцэн УИХ-д өргөн мэдүүлэхээр шийдвэрлэлээ. Хуулийн төсөл нь авлига, хууль бус хөрөнгөжлийг таслан зогсоох, төрийн албан тушаалтны шударга, хариуцлагатай байдлыг бэхжүүлэхэд чиглэж байна.

Монгол Улсад авлигын эсрэг хэд хэдэн хууль тогтоомж үйлчилж байгаа ч олон улсын байгууллагуудын үнэлгээнд үр дүн муутай, авлигын түвшин өндөр хэвээр байгааг удаа дараа онцолж ирсэн. Тухайлбал, “Транспэрэнси Интернэшнл” олон улсын байгууллагын Авлигын төсөөллийн индексээр Монгол Улс 2022 онд 116 дугаар байр, 2023 онд 121 дүгээр байрт эрэмбэлэгдсэн нь өмнөх оноос ухарсан дүн юм.

Улс төрд нөлөө бүхий этгээдүүд эрх мэдлээ урвуулан ашиглаж, нийгмийн тэгш бус байдал, иргэдийн боломжийг хязгаарлаж байгааг уг хуулийн төсөлд тодорхой дурдсан байна. Мөн хууль бус хөрөнгийг хураан авах, зарцуулах, түүнд хяналт тавих, авлигын мэдээлэгчийг хамгаалах зэрэг асуудлаарх эрх зүйн зохицуулалт дутмаг байгаа нь авлигыг гааруулах шалтгаан болж байгааг онцолжээ.

Иймээс шударга ёсыг хангах, нийтийн хөрөнгө, нийгмийн ашиг сонирхлыг хамгаалах, хураагдсан хөрөнгийг нийгмийн сайн сайхны төлөө ашиглах зорилго бүхий энэхүү хуулийн төслийг боловсруулж, УИХ-д өргөн мэдүүлэх шийдвэрийг гаргасан байна. Үүнтэй холбогдуулан авлигын эсрэг багц хуулийн төслийг боловсруулах үүрэг бүхий Ажлын хэсгийг холбогдох байгууллагын оролцоотойгоор байгуулжээ.

Эх сурвалж: Засгийн газрын хэвлэл мэдээлэл, олон нийттэй харилцах газар