Дөрвөн улирлын аялал жуулчлалыг хөгжүүлэх, хувийн хэвшлийн хөрөнгө оруулалтаар дэд бүтцийг өргөтгөх зорилгоор Засгийн газрын өнөөдрийн хуралдаанаар аялал жуулчлалын салбарт үйл ажиллагаа эрхлэгчдэд хөнгөлөлттэй нөхцөлөөр зээл олгохоор шийдвэрлэлээ. Энэ хүрээнд арилжааны банкуудын эх үүсвэрт тулгуурлан зургаан жилийн хугацаатай, жилийн 6 хувийн хүүтэй зээлийг олгох аж.

Тус хөтөлбөрийн хүрээнд нийт хоёр их наяд төгрөгийн зээлийг 2028 он хүртэл олгохоор төлөвлөж байгаа бөгөөд энэ нь зах зээлийн чадавхийг нэмэгдүүлж, үйлчилгээний чанарыг дээшлүүлэх, аялал жуулчлалын шинэ бүтээгдэхүүн бий болгох, Монголын соёлын өв, өвөрмөц онцлогийг дэлхийд сурталчлахад түлхэц болох юм. Мөн бүсчилсэн хөгжилд түлхэц өгч, хил орчмын болон бүх улирлын аялал жуулчлалыг идэвхжүүлэх, жуулчдын тоог нэмэгдүүлэхэд чиглэж байна.

Төсөөлж буйгаар, хөтөлбөрийн хэрэгжилтийн үр дүнд 2030 он гэхэд жилд ирэх жуулчны тоо 623 мянгаар нэмэгдэж хоёр саяд хүрэх, найман мянга гаруй ажлын байр шинээр бий болох, цаашлаад нэг тэрбум ам.долларын валютын орлого улсын эдийн засагт нэмэгдэн орох боломж бүрдэх юм.

Эх сурвалж: Засгийн газрын хэвлэл мэдээлэл, олон нийттэй харилцах газар