Монгол Улсын Их Хурлын дарга Д.Амарбаясгаланд өнөөдөр буюу 2025 оны тавдугаар сарын 21-ний өдөр Монгол Улсын Ерөнхий сайд Л.Оюун-Эрдэнэ, Тэргүүн шадар сайд Л.Гантөмөр, Шадар сайд Т.Доржханд, Хууль зүй, дотоод хэргийн сайд О.Алтангэрэл нар хамтран “Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай” хуулийн төсөл болон хамт өргөн мэдүүлсэн бусад хуулийн төслийг өргөн барилаа.

Төсөлд зааснаар, авлига болон мөнгө угаах гэмт хэргийг оновчтой тодорхойлоогүй, хураан авсан хууль бус хөрөнгийн зарцуулалт, хяналтын тогтолцоо сул, авлигын мэдээлэгчийг хамгаалах, урамшуулах эрх зүйн орчин бүрдээгүй байдал нь авлигыг гааруулах нэг хүчин зүйл болж байгааг онцолжээ. Мөн төрийн албан хаагчийн хууль бус үйлдлээс улбаалан төрд учруулсан хохирлыг нөхөн төлүүлэх эрх зүйн зохицуулалт хангалтгүй байгааг тэмдэглэсэн байна.

Шударга ёсыг хангах, нийтийн албан тушаалтны гэмт хэргийг бууруулах, төсвийн хөрөнгө болон олон нийтийн ашиг сонирхлыг хамгаалах, хураан авсан хөрөнгийг нийгмийн сайн сайхны төлөө зарцуулах нь энэ хуулийн төслийн гол зорилго юм. Хуулийн төсөл батлагдсанаар авлигын эсрэг эрх зүйн орчин илүү тодорхой болж, хууль зүйн үр нөлөө, нийгмийн шударга байдлыг дээшлүүлнэ гэж үзэж байна.

Эх сурвалж: Улсын Их Хурлын Хэвлэл мэдээллийн газар