Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр өнөөдрийн Засгийн газрын хуралдаанд 14 мега төслийн явц, цаашдын хэрэгжилтийн талаар танилцууллаа. Тэрбээр хамтарсан Засгийн газар эдгээр төслийг эрэмбэлж, нэгдсэн ойлголтод хүрэхийн тулд шат дараатай арга хэмжээ авч ажилласны үр дүнд зарим нь амжилттай урагшилж байгааг онцлон тэмдэглэв.

Эрдэнэбүрэнгийн усан цахилгаан станцын тусгайлсан зээлийн хэлэлцээр байгуулагдаж, Гашуунсухайт–Ганцмодны хил холболтын төмөр замын бүтээн байгуулалт урагшилж, Газрын тос боловсруулах үйлдвэрийн нэмэлт зээлийн гэрээ баталгаажин, Монгол–Францын хамтарсан ураны төслийн хөрөнгө оруулалтын гэрээг байгуулсан зэрэг нь эхнээсээ үр дүнд хүрч эхэлсэн гэж тэр мэдэгдэв.

Төслүүдийг эдийн засаг, нийгэмд үзүүлэх нөлөөллөөр нь дараах дөрвөн үндсэн ангилалд хуваасан байна. Үүнд:

1. Экспортын хүчин чадлыг нэмэгдүүлэх төслүүд – эдгээр нь экспортын орлогыг хоёр дахин өсгөж, тээврийн зардлыг 50 хувиар бууруулан, Евро-Азийг холбосон шинэ гарц бий болгох үр дүнтэй.

2. Дотоодын үйлдвэрлэлийг нэмэгдүүлэх төслүүд – ган, төмөрлөгийн үйлдвэрлэл, нефть-химийн салбарыг хөгжүүлж, шатахууны дотоодын хэрэглээний 50–60 хувийг хангах чадамжтай болно.

3. Эрчим хүчний нийлүүлэлтийг нэмэгдүүлэх төслүүд – уул уурхайн бүсийн эрчим хүчний хангамжийг сайжруулж, төвийн бүсийн нэгдсэн сүлжээнд горимын тохируулгын эх үүсвэр бий болгож, импортын зардлыг жилд дунджаар 45–50 сая ам.доллараар бууруулах боломж бүрдүүлнэ.

4. Нийгмийн дэд бүтцийг сайжруулах төслүүд – иргэдийн амьдралын чанарт шууд нөлөө үзүүлэх бүтэц, дэд бүтцийн төслүүдийг агуулж байна.

Одоогоор дараах таван төсөл хэрэгжиж эхлээд байна. Үүнд:

• Гашуунсухайт–Ганцмод хил дамнасан төмөр зам

• Ачаа тээврийн шилжүүлэн ачих терминал

• Газрын тос боловсруулах цогцолбор

• Монгол–Францын ураны төсөл

• Эрдэнэбүрэнгийн усан цахилгаан станц

• Нүүрс хими–Кокс химийн цогцолбор төслийн хүрээнд Хөх нүүрсний үйлдвэр

Цаашид эдгээр төслүүдийг шат дараатай хэрэгжүүлэх замаар Монгол Улсын эдийн засгийн суурь бүтцийг шинэчилж, стратегийн чадавхыг нэмэгдүүлэх зорилготой байгааг Тэргүүн Шадар сайд онцоллоо.

Эх сурвалж: Засгийн газрын хэвлэл мэдээлэл, олон нийттэй харилцах газар