Ахмад дипломатч, доктор Б.Энхмандах болон түүний охин, Монгол Улсын Их Сургуулийн ахлах багш, доктор Э.Энхчимэг нарын хамтран бүтээсэн “Дундчуудын нийгэм: Умардын хөгжлийн загвар” хэмээх бүтээлийн цомгийн нээлт өнөөдөр Гадаад харилцааны яаманд боллоо.

Доктор Б.Энхмандах нь 2009-2013 оны хооронд Швед улсад суух Монгол Улсын Элчин сайдаар ажиллаж байх хугацаандаа умардын буюу Скандинавын орнуудын хөгжлийн загвар, онцлогийг олон нийтэд таниулах зорилгоор судалгаа, нийтлэлээ цувралаар нийтэлж эхэлсэн байдаг. Энэ ажлын хүрээнд тэрбээр “Нийгмийн хөгжлийн загварын тухай”, “Дундчуудыг түшин хөгжих хөгжлийн хандлага ба Монгол орон”, “Сайхан амьдруулах жор: Умардын орнуудын туршлага”, “Дани загвар: Европын амжилтын түүх” зэрэг бүтээлүүдийг туурвиж, заримыг нь албан ёсны зөвшөөрлөөр хөрвүүлэн уншигчдын гарт хүргэжээ.

Эдгээр дөрвөн бүтээлийг нэгтгэсэн уг цомог нь умардын загвар гэж чухам юу болох, энэхүү нийгмийн зохион байгуулалт ямар үнэт зүйл, давуу, сул талтай вэ зэрэг ойлголтыг уншигчдад өгөх зорилготой. Умардын загвар нь дундаж давхаргыг түшин тогтвортой, шударга, нээлттэй нийгмийг бүтээхэд чиглэдэг болохыг Элчин сайд асан онцолж, ийм төрлийн үзэл баримтлал Монголын хөгжлийн чиг хандлагатай нийцэж болохыг тэмдэглэлээ.

Нээлтийн үеэр “Непко” хэвлэлийн газарт хэвлүүлсэн уг цомгийн дээжийг Гадаад харилцааны яам, МУИС, Монголын Элчин сайд нарын клуб болон арга хэмжээнд оролцсон зочдод гардуулжээ.

Эх сурвалж: Гадаад харилцааны яам