НҮБ-ын Аялал жуулчлалын байгууллагын “Аялал жуулчлалын бодлого, стратегийн 19 дэх удаагийн Ази, Номхон далайн бүсийн удирдах тушаалтнуудыг чадавхжуулах хөтөлбөр”-ийн уулзалтыг Монгол Улсад анх удаа зохион байгуулж байна. Уулзалтыг Соёл, спорт, аялал жуулчлал, залуучуудын яам (ССАЖЗЯ) болон НҮБ-ын Аялал жуулчлалын байгууллага хамтран 2025 оны тавдугаар сарын 22-ныг хүртэл үргэлжлүүлэн зохион байгуулж буй юм.

Энэхүү хөтөлбөр нь бүс нутгийн удирдах албаны мэргэжилтнүүдийг чадавхжуулах, улс орнуудын аялал жуулчлалын бодлогын уялдаа холбоог нэмэгдүүлэх, соёлын өв, тогтвортой хөгжил, инновац зэрэг чиглэлд туршлага солилцох зорилготой. Энэ удаагийн уулзалтад БНСУ, Тайланд, Шри Ланка, Мальдив зэрэг 20 гаруй орны төлөөлөгч оролцож байна.

ССАЖЗЯ-ны АЖБХЗГ-ын дарга Н.Болормаа, “Манай улс нүүдлийн соёлыг бүрэн хадгалсан, цөөхөн орны нэг. Үүнийг аялал жуулчлалын онцлог болгон хөгжүүлэх боломж бий. Үүн дээр суурилсан контент бүтээх, цахим орчинд сурталчлах, дөрвөн улирлын аяллыг танилцуулах нь чухал” хэмээн онцолсон бол Малдивын дэд сайд Али Шинан өөрийн орны тогтвортой аялал жуулчлалын бодлогоос хуваалцлаа. Түүний хэлснээр, Мальдив 1 мянга гаруй арлаас бүрддэг бөгөөд тэдгээрийг түшиглэн жуулчлалын өргөн сонголт санал болгодог аж.

Монгол Улс 2023 онд 808 мянган жуулчин хүлээн авсан бөгөөд энэ тоог 2030 онд хоёр саяд хүргэж, эдийн засагт 3-4 тэрбум ам.долларын орлого оруулж, ДНБ-ий 10 хувийг бүрдүүлэх зорилт тавьжээ.

ССАЖЗ-ын сайд Ч.Номин “Монгол Улсын аялал жуулчлалын дунд хугацааны стратегийг дэлхийн хамгийн том байгууллагатай хамтран боловсруулсан. Мөн хүний нөөц, нислэг, дэд бүтэц, үйлчилгээний чанарыг зэрэг сайжруулж, олон улсад өрсөлдөхүйц салбар болгохыг зорьж байна. Үүний тулд чадавхжуулах төв байгуулна” гэдгийг онцлон тэмдэглэлээ.

Энэ уулзалт нь Монгол Улсын соёлын өв, аялал жуулчлалын бодлогыг бүс нутагт сурталчлах, харилцан уялдаатай бодлого боловсруулах, олон улсын хамтын ажиллагааг бэхжүүлэх чухал үйл явдал болж байна.

Эх сурвалж: ССАЖЗЯ, НҮБ-ын Аялал жуулчлалын байгууллага