Гадаад харилцааны сайд Б.Батцэцэг Бүгд Найрамдах Филиппин Улсад хийж буй албан ёсны айлчлалын хүрээнд тус улсын Ерөнхийлөгч Фердинанд Ромуалдез Маркос Жуниорт бараалхаж, Монгол Улсын Ерөнхийлөгч У.Хүрэлсүхийн мэндчилгээг уламжлан, илгээсэн захидлыг ёслол төгөлдөр гардууллаа.

Уулзалтын үеэр талууд хоёр орны эдийн засгийн хамтын ажиллагааг гүнзгийрүүлэх өргөн боломж байгааг онцолсон бөгөөд ноос, арьс шир зэрэг хөдөө аж ахуйн гаралтай бүтээгдэхүүний экспортыг нэмэгдүүлэх, аж үйлдвэрийн салбарт хөрөнгө оруулалт татах, жижиг дунд үйлдвэрлэлийг дэмжих чиглэлээр нягт хамтран ажиллахаа илэрхийлэв.

Ерөнхийлөгч Ф.Маркос Жуниор хоёр орны уламжлалт найрсаг харилцааг өндрөөр үнэлж, ирэх хагас зуун жилд бүх салбарт хамтын ажиллагааг эрчимжүүлж хөгжүүлэхэд бэлэн байгаагаа илэрхийлсэн байна. Тэрбээр хөдөлмөр, нийгмийн хамгааллын эрх зүйн орчныг сайжруулж, англи хэлний багшийн солилцоо, мэргэжлийн ажиллах хүчний хөтөлбөр хэрэгжүүлэх зэргээр бодит хамтын ажиллагааг тэлэхээ мэдэгдэв.

Сайд Б.Батцэцэг хоёр улсын хооронд шууд нислэг үйлдэх боломжийг бүрдүүлэх нь худалдаа, аялал жуулчлал, соёлын харилцаанд томоохон түлхэц болохыг тэмдэглэж, мөн Филиппинд амьдарч, ажиллаж, суралцаж буй монгол иргэдийн эрх ашгийг хамгаалах асуудалд анхаарал хандуулна гэдэгт итгэлтэй буйгаа илэрхийлжээ.

Мөн Монголын “Тэрбум мод” санаачилгыг Филиппиний “2028 он хүртэл 5 сая мод” тарих үндэсний хөтөлбөртэй уялдуулан, уур амьсгалын өөрчлөлтийн эсрэг хамтарсан төсөл, хөтөлбөр хэрэгжүүлэхээр санал солилцов.

Энэхүү айлчлал нь Монгол Улс Зүүн өмнөд Азийн орнуудтай харилцаагаа өргөтгөн хөгжүүлэхэд стратегийн хувьд чухал алхам боллоо.

Эх сурвалж: Гадаад харилцааны яам