Гадаад харилцааны яамны Төрийн нарийн бичгийн дарга Л.Мөнхтүшиг энэ сарын 19-нд НҮБ-ын Хүн амын сангийн Ази, Номхон далайн бүсийн орлогч захирал доктор Александр Саша Бодирозаг хүлээн авч уулзлаа.
Уулзалтын үеэр Төрийн нарийн бичгийн дарга Л.Мөнхтүшиг НҮБ-ын Хүн амын сантай тогтоосон хамтын ажиллагаандаа сэтгэл хангалуун байгаагаа илэрхийлээд, Монгол Улсын хүн амын хөгжилд чиглэсэн бодлого, Тогтвортой хөгжлийн зорилгыг хэрэгжүүлэх чиглэлээр авч хэрэгжүүлж буй үйл ажиллагааг танилцуулсан юм. Тэрбээр охид, эмэгтэйчүүдийн нөхөн үржихүйн эрүүл мэндийг сайжруулах, шийдвэр гаргах түвшинд эмэгтэйчүүдийн оролцоог нэмэгдүүлэх, хүүхэд, залуучуудын чадавхыг бэхжүүлэх, жендерийн тэгш байдлыг хангах чиглэлээр НҮБ-ын Хүн амын сан оруулж буй хувь нэмэрт гүн талархал илэрхийлэв.
НҮБ-ын Хүн амын сангийн орлогч захирал доктор Бодироза Монгол Улсын Засгийн газраас байгууллагын үйл ажиллагааг тууштай дэмжсэнийг онцолж, цаашид эхийн эндэгдлийг бууруулах, жендерийн тэгш бус байдлыг арилгах зэрэг тодорхой зорилтот чиглэлд хамтын ажиллагаагаа үргэлжлүүлэхээ илэрхийллээ.
Эх сурвалж: Гадаад харилцааны яам
