Ерөнхий сайд Л.Оюун-Эрдэнийн хүү О.Тэмүүлэнгийн найз бүсгүй Ө.Өгөөмөр цахим орчинд өндөр үнэтэй эд зүйлсийг бэлгэнд авсан талаарх мэдээлэл нийтэлсний дараа олон нийтийн бухимдал хүрээгээ тэлж, Ерөнхий сайдаас хариуцлага нэхсэн жагсаал зургаа дахь өдрөө Сүхбаатарын талбайд үргэлжилж байна. “Огцрох амархан” хэмээх уриатай энэхүү жагсаалд оролцогчид улс төрийн хариуцлага нэхэж, Ерөнхий сайдыг өөрийн хүсэлтээр огцрохыг шаардаж байгаа юм.

Жагсагчдын гол шаардлага нь зөвхөн тухайн нөхцөл байдалтай хязгаарлагдахгүй бөгөөд улстөрчдийн хэт тансаг хэрэглээ, ёс зүйн асуудлыг тогтолцооны хэмжээнд шүүмжилж, шинэ эвслийн Засгийн газар байгуулахыг эсэргүүцэж байна. Мөн Үндсэн хуульд өөрчлөлт оруулах нь тогтолцооны тогтворгүй байдалд хүргэж болзошгүй гэсэн байр суурьтай байгаагаа илэрхийлжээ.

Иргэд жагсаалын үеэр Ерөнхий сайдыг огцруулах шаардлагад гарын үсэг цуглуулж эхэлсэн бөгөөд одоогоор УИХ-ын дөрвөн гишүүн албан ёсоор уг бичигт гарын үсгээ зураад байна. Тэдгээр нь УИХ-ын гишүүн Ч.Лодойсамбуу, Ж.Баярмаа, Ж.Золжаргал, С.Цэнгүүн нар юм. Уг үйл явц нь сүүлийн үед УИХ-ын гишүүд иргэдийн дуу хоолойг сонсож, нээлттэй байр суурь илэрхийлэх хэрэгцээ нэмэгдэж буйг илтгэж байна.

Жагсаал одоогоор тайван байдлаар үргэлжилж байгаа ч олон нийт, залуусын дэмжлэгээр хөдөлгөөн улам өргөжиж, улс төрийн дарамт, хариуцлагын асуудал нийгмийн анхаарлын төвд байна.