Монгол-Францын Засгийн газар хоорондын комиссын ээлжит хуралдаан 11 жилийн дараа Францын нийслэл Парис хотноо амжилттай болж өндөрлөлөө. Энэ удаагийн уулзалтад Монголын талаас Засгийн газрын Хэрэг эрхлэх газрын дарга Н.Учрал, Францын талаас Европ, Гадаад хэргийн яамны Ерөнхий нарийн бичгийн дарга Анн-Мари Дэкот нар оролцож, хоёр орны стратегийн түншлэлийг бэхжүүлэх хэд хэдэн чухал асуудлаар харилцан тохиролцолд хүрлээ.

Хамтын ажиллагааны гол чиглэлүүдийн нэг нь цацрагийн хяналт, шинжилгээний олон улсын итгэмжлэгдсэн лаборатори байгуулах асуудал байв. Уг лаборатори нь Дорноговь аймагт байгуулагдаж, цацраг идэвхит ашигт малтмалын хүний эрүүл мэнд, мал амьтан, хүрээлэн буй орчинд үзүүлэх нөлөөлөлд хяналт тавих зорилготой. Францын талаас уг санаачлагыг дэмжихээ илэрхийлж, лабораторийн байгуулалтад хөрөнгө оруулалт хийхэд бэлэн байгаагаа мэдэгдэв.

Мөн энэ төслийн хүрээнд хараат бус хяналтын зөвлөл байгуулж, иргэний нийгмийн байгууллагууд, мэргэжлийн холбоод, орон нутгийн иргэдийн оролцоог ханган, хяналт-шинжилгээг ил тод, нээлттэй байлгах нөхцөлийг бүрдүүлэхээр тохиролцов.

Үүнээс гадна:

• Онцгой байдлын чиглэлээр нисдэг тэрэг, техник хэрэгслийн дэмжлэг үзүүлэх,

• Эрчим хүчний эх үүсвэрийг төрөлжүүлэх,

• Боловсрол, соёлын салбарт харилцааг өргөжүүлэхээр санал солилцов.

Хуралдааны үеэр Монгол Улсын Иргэний нисэхийн ерөнхий газар болон Францын Иргэний нисэхийн ерөнхий газар хооронд “Иргэний нисэхийн салбарт хамтран ажиллах тухай Техник хамтын ажиллагааны гэрээ”-нд гарын үсэг зурсан нь салбарын хөгжилд чухал түлхэц болно хэмээн талууд онцоллоо.

Мөн 2026 онд Монгол Улсад зохион байгуулагдах Цөлжилттэй тэмцэх тухай НҮБ-ын суурь конвенцын Талуудын 17 дугаар бага хуралд Франц улс дэмжин оролцохоо мэдэгдсэн юм.

Энэ жил Монгол, Франц хоёр орны хооронд дипломат харилцаа тогтоосны 60 жилийн ойн жил тохиож буй бөгөөд энэхүү уулзалт нь хамтын ажиллагааны шинэ хуудас нээж байна.

Эх сурвалж: ЗГХЭГ, Монгол Улсаас Франц улсад суугаа ЭСЯ