Канад Улсын Засгийн газрын санхүүжилттэйгээр хэрэгжиж буй МЕРИТ төсөл буюу “Хүний эрх, ёс зүйг дээдэлсэн, хүртээмжтэй төрийн албаны шинэчлэлийг бэхжүүлэх” хөтөлбөрийг Дундговь аймагт хоёр дахь удаагаа хэрэгжүүлэхээр боллоо. Төслийг “Каталист плас” байгууллага хэрэгжүүлж байгаа ба нийт дөрвөн аймагт хүрч ажиллах юм.

Төслийн үндсэн зорилго нь иргэн төвтэй, хүртээмжтэй төрийн албыг төлөвшүүлэх, төрийн үйл ажиллагаанд иргэдийн оролцоо, мэдлэгийг нэмэгдүүлэх, орон нутгийн иргэдийн хэрэгцээ, эрэлтэд нийцсэн төрийн үйлчилгээ бий болгоход оршино. Энэхүү зорилтыг 2030 он хүртэлх хугацаанд шат дараатайгаар хэрэгжүүлэхээр төлөвлөжээ.

Төслийн хүрээнд:

• Төрийн албаны зөвлөл, Хүний эрхийн үндэсний комисс, Жендэрийн үндэсний хороо зэрэг байгууллагуудтай хамтран ажиллаж,

• Төрийн албаны өнөөгийн нөхцөл байдалд тохирсон шинэ аргачлал, тогтолцоо, туршлага нэвтрүүлэх,

• Албан хаагчдын мэдлэг, чадварыг сайжруулах сургалт, зөвлөгөө, менторингийн үйлчилгээ үзүүлэх,

• Иргэдийн мэдлэг, оролцоог нэмэгдүүлэх практик үйл ажиллагаа хэрэгжүүлэх аж.

Мөн МЕРИТ төсөл өмнө нь 2018–2024 онд Дундговь аймагт хэрэгжихдээ, төрийн албаны хүний нөөцийн чадавхыг бэхжүүлэх, жендэрийн тэгш байдал хангах, уул уурхайн бодлогын төлөвлөлтөд зөвлөмж өгөх зэрэг чиглэлээр ажилласан. Үүний үр дүнд тус аймгийн ЗДТГ Олон улсын ISO 9001:2015 чанарын удирдлагын тогтолцоог амжилттай нэвтрүүлсэн нь энэхүү төслийн үр дүнтэй байсныг харуулж байна.

Эх сурвалж: МЕРИТ төсөл, Төрийн албаны зөвлөл