Улсын Их Хурлын Аюулгүй байдал, гадаад бодлогын байнгын хороо, Гадаад харилцааны яам, МУИС-ийн Улс төр судлал, олон улсын харилцаа, нийтийн удирдлагын сургууль хамтран зохион байгуулсан “Дэлхийн шинэ дэг журмын зааг дээрх Бүс нутаг, улс орнууд” сэдэвт олон улсын эрдэм шинжилгээний хурал өнөөдөр Төрийн ордонд боллоо.

Хурлыг УИХ-ын гишүүн, Аюулгүй байдал, гадаад бодлогын байнгын хорооны дарга Г.Тэмүүлэн нээж хэлсэн үгэндээ, дэлхийн улс төр, аюулгүй байдлын орчин үлэмж хурдтай өөрчлөгдөж байгааг онцлон, Монгол Улс гадаад бодлогын чиглэлээр судалгаа, шинжилгээний институцийн чадавхыг бэхжүүлэх, бодлого боловсруулах үйл явцад судалгааг түлхүү ашиглах шаардлагатайг цохон тэмдэглэв.

Монгол Улсын Ерөнхийлөгчийн гадаад бодлогын зөвлөх Э.Одбаяр тэнцвэртэй гадаад бодлогын зарчмыг тайлбарлаж, хоёр хөрш болон гуравдагч хөрштэй харилцах бодлогын уялдаа, дотоодын эв нэгдэл, нэг цонхны бодлогын ач холбогдлыг онцолсон бол МУИС-ийн доктор С.Баясгалан Монгол Улсын гадаад харилцааны идэвхийг онцолж, шинжлэх ухаан, технологийн хөгжлийг гадаад бодлогод ашиглах цаг ирснийг дурдсан юм.

Харин ХИС-ийн ахлах багш доктор П.Мягмардорж геополитикийн тогтворгүй байдал нь Монголын гадаад бодлогын сонголтыг хязгаарлаж байгааг сануулж, судлаачдын хийж буй бодлогын судалгааг шийдвэр гаргагчид бодитоор анхаарч, гадаад харилцаанд илүү олон хувилбар, боломжийг эрэлхийлэх ёстойг тэмдэглэлээ.

Энэхүү хурал нь үдээс өмнө Төрийн ордонд нэгдсэн хуралдаантайгаар эхэлж, үдээс хойш МУИС-д салбар хуралдаанаар үргэлжилж байна. Хурлын хүрээнд есөн улсын их, дээд сургууль, эрдэм шинжилгээний байгууллагын 16 судлаач зочин оролцож, дэлхийн хурдацтай өөрчлөгдөж буй нөхцөл байдалд бүс нутгийн улс орнуудын хариу үйлдэл, төлөв, боломжуудын талаар судалгаа, дүгнэлтээ хуваалцаж байна.

Эх сурвалж: УИХ-ын Хэвлэл мэдээллийн алба, ГХЯ