Монгол Улсын хамтарсан Засгийн газрын тэргүүн Л.Оюун-Эрдэнийг тойрсон хөрөнгө орлогын асуудал олон нийтийн бухимдлыг өдөөж, гурав дахь удаагийн тайван жагсаал өнөөдөр Сүхбаатарын талбайд болж байна. Иргэд Ерөнхий сайдаас ил тод тайлбар шаардсаар байгаа бол улс төрийн гол хүчнүүд, УИХ-ын гишүүд энэ асуудалд харилцан адилгүй байр суурь илэрхийлэв.
Н.Номтойбаяр: “Хөрөнгөжсөн бол хураа”
“Үндэсний эвсэл” эвслийн тэргүүн, УИХ-ын гишүүн Н.Номтойбаярын хэлснээр, хууль бусаар хөрөнгөжсөн бол төрийн өмчийг хураах ёстой. Тэрбээр төрийн албаны чиг үүргийг хувийн хэвшилд шилжүүлж, 10 их наядыг хэмнэх боломжтой гэж үзэж байна. Иргэдийн тавьж буй шаардлагыг зүй ёсны гэж үнэлж, улс төр өөрөө цэвэрших, хариуцлагын тогтолцоог бий болгох цаг ирсэн гэдгийг онцоллоо.
Т.Доржханд: “Энэ бол мега төслийг саармагжуулах оролдлого”
Шадар сайд, ХҮН намын дарга Т.Доржханд жагсаал, хардлагыг мега төслийг гацаах гэсэн улс төрийн санаархал гэж үзэж байна. Тэрбээр “Мега төсөл яригдахаар л эсэргүүцэл гарч ирдэг, ийм тохиолдол давтагддаг” хэмээн хэлсэн. Мөн Ерөнхий сайд хулгай хийсэн, худал ярьсан хүн биш гэдгийг батлан, өөрөө эрх мэдэлгүй, хийж буй ажил нь гүтгэлэгт дарагдаж байгаад харамсаж буйгаа илэрхийллээ.
А.Ариунзаяа: “Мэдэгдэл хийхээсээ өмнө нотолгоог нягтлах ёстой”
МАН-ын бүлгийн дэд дарга А.Ариунзаяа УИХ-ын гишүүд нотолгоогүйгээр мэдэгдэл хийж, олон нийтийг төөрөгдүүлэх нь буруу гэж үзэж байна. Тэрбээр “Хүү нь найз охиндоо өгсөн бэлгийн эх үүсвэр, орлогоосоо хамаарч асуудал бий болдог бол тухайн этгээд нотлох ёстой. Гэвч өнөөгийн байдлаар нотолгоо бүрдээгүй” гэжээ.
Өнөөдрийн жагсаалын сүүдэр дундах өнгөрсөн дурсамж
Ерөнхий сайд Л.Оюун-Эрдэнэ 2018 онд тухайн үеийн УИХ-ын дарга М.Энхболдыг огцрохыг шаардаж байсан “Шударга тав” гишүүдийн нэг билээ. Тэр үед ард түмэнд хандаж “Одоо л тэмцэх цаг нь шүү” хэмээн уриалж байсан бол 2022 онд өөрөө Ерөнхий сайдын хувиар жагсагч залуусын өмнө гарч уучлал гуйж, “Бид шийдэл ярья” гэж хэлж байв. Харин энэ удаа яг ийм нөхцөл байдалд орсон тэрбээр өөрийн биеэр иргэдтэй уулзаагүй байгаа нь олон нийтийн шүүмжлэл дагуулж байна.
