Монгол Улсын Засгийн газар, Жендэрийн үндэсний хороо, Азийн хөгжлийн банктай хамтран хэрэгжүүлж буй техникийн төслийн хүрээнд “Жендэрийн тэгш байдал ба уур амьсгалын өөрчлөлт” сэдэвт олон улсын хурлыг энэ сарын 22-ны өдөр зохион байгуулах гэж байна.
Энэхүү хурал нь 2026 онд Монгол Улсад зохион байгуулагдах Цөлжилттэй тэмцэх тухай НҮБ-ын суурь конвенцын оролцогч талуудын XVII бага хурлын бэлтгэл алхам бөгөөд жендэрийн тэгш байдал, биологийн олон янз байдал, уур амьсгалын өөрчлөлтийн харилцан хамаарлыг онцлон хэлэлцэх ажээ.
Хурлын хүрээнд:
-
Бүс нутгийн болон олон улсын сайн туршлага, санаачилга солилцох
-
Монгол Улсын туршлага, тулгамдсан асуудлуудад олон талын шийдэл санал болгох
-
Цөлжилт, уур амьсгалын өөрчлөлтийн эсрэг жендэрт суурилсан бодлогын уялдаа холбоог нэмэгдүүлэх зорилгоор хэлэлцүүлэг өрнөх юм.
Ажлын хэсгийг Монгол Улсын Ерөнхий сайдын захирамжаар УИХ-ын гишүүн, Байгаль орчин, уур амьсгалын өөрчлөлтийн сайд С.Одонтуяа ахалж буй бөгөөд бэлтгэл ажлыг хангах ээлжит хурлын үеэр Жендэрийн үндэсний хорооны Нарийн бичгийн дарга, Ажлын албаны дарга Т.Энхбаяр урьдчилсан зөвлөлдөх уулзалтын үр дүн болон хурлын бэлтгэл ажлын явцын талаар мэдээлэл өгч, оролцогчид санал солилцсон байна.
Эх сурвалж: Жендэрийн үндэсний хороо
