Монгол Улсын Их Хурлын Аюулгүй байдал, гадаад бодлогын байнгын хорооны 2025 оны тавдугаар сарын 14-ний хуралдаанаар мансууруулах эм, сэтгэцэд нөлөөт бодистой холбоотой аюулыг хязгаарлах чиглэл бүхий тогтоолын төслийг хэлэлцэн баталлаа. Энэхүү тогтоолоор Засгийн газарт хууль, бодлогын хэд хэдэн чиглэлд хугацаатай үүрэг өгч байгаа юм.

Сүүлийн жилүүдэд хар тамхи, сэтгэцэд нөлөөт бодисын хэрэглээ эрчимтэй нэмэгдэж, 18-25 насны залуусын дунд түгээмэл болж байгааг Байнгын хорооны дарга Г.Тэмүүлэн онцолжээ. Тэрбээр энэ асуудлыг үндэсний аюулгүй байдалд нөлөөлөхүйц ноцтой гэж үзэж, УИХ анхааралтай ажиллах шаардлагатайг тодотгосон байна.

Байнгын хорооны тогтоолоор:

• Мансууруулах эм, сэтгэцэд нөлөөт бодисын хууль бус эргэлт, хэрэглээний эсрэг эрх зүйн шинэчлэл хийх;

• Хориглосон болон шинээр гарч буй бодисын жагсаалтыг тогтмол шинэчилж, бүртгэлд хамруулах;

• Хэрэглэгчдэд зориулсан сэтгэл зүй, эмчилгээний тусламжийн тогтолцоог бий болгох;

• Урьдчилан сэргийлэх мэдээлэл, сургалт, соён гэгээрүүлэх арга зүйг боловсруулан, эцэг эхчүүд болон хүүхэд, залуучуудад тохируулсан хөтөлбөр хэрэгжүүлэх;

• Сургагч багш нарыг бэлтгэж, нийгэмд түгээн дэлгэрүүлэх ажлыг эрчимжүүлэх зэрэг чиглэлүүдийг тусгасан байна.

Хуралдаанд оролцсон гишүүд тогтоолын төсөлтэй холбогдуулан санал хэлж, олонхийн дэмжлэгтэйгээр тогтоолыг баталжээ.

Эх сурвалж: Улсын Их Хурал