УИХ-ын Эдийн засгийн байнгын хорооны тавдугаар сарын 14-ний өдрийн хуралдаанаар Засгийн газраас өргөн барьсан “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийг хэлэлцэв. Төслийг Шадар сайд С.Амарсайхан танилцуулж, 2026 онд хэрэгжүүлэх бодлогын зорилтуудыг тодотголоо.

Төлөвлөгөөг Үндсэн хууль болон Хөгжлийн бодлого, төлөвлөлтийн тухай хуулийн дагуу боловсруулсан бөгөөд макро эдийн засгийн тогтвортой байдал, эдийн засгийн өсөлтийг 6 хувиас дээш түвшинд хадгалах, нэг хүнд ногдох ДНБ-ийг 8090 ам.долларт хүргэх, ядуурлыг 5 хувиар бууруулах зорилтыг тусгажээ.

2026 онд хэрэгжүүлэхээр тусгасан бодлогын дөрвөн тэргүүлэх чиглэлд дараах зорилтууд багтжээ:

• Эдийн засгийн эрх чөлөөг цогцлоох: Төсвийн урсгал зардлыг ДНБ-ий 24 хувиас хэтрүүлэхгүй байхаар төлөвлөж, төрийн албан хаагчдын тоог 15 хувиар бууруулах замаар бүтэц, чиг үүргийн шинэчлэл хийнэ. Төрийн худалдан авалтад хиймэл оюун ухааныг ашиглана.

• Үндэсний баялгийн сан, төрийн өмчит компаниудын реформ: Төрийн өмчит компаниудын зардлыг 15 хувиар бууруулж, бүтээмжийг 30 хувиар нэмэгдүүлэх зорилт тавьжээ.

• Хүний хөгжлийн бодлого: Ядуурлыг бууруулж, боловсролын чанар, хүртээмжийг сайжруулах 39 төсөл, хөтөлбөр хэрэгжүүлнэ. 108 сургууль, 95 цэцэрлэг барьж ашиглалтад оруулах зорилт тавьсан байна.

• Бүсчилсэн хөгжлийн бодлого: Орон нутгийн дэд бүтцийн орон сууцанд хамрагдсан өрхийн тоог 5683 хүргэх, хөгжлийн индексийг нэмэгдүүлэхээр тооцсон байна.

Мөн 2026 оныг “Боловсролыг дэмжих жил” болгон зарлаж, сургалтын чанар, багшийн ур чадвар, төгсөгчдийн хөдөлмөр эрхлэлтийн үзүүлэлттэй уялдсан шинэ үнэлгээний систем нэвтрүүлэхээр тусгажээ.

Төслийн хэлэлцүүлгийн үеэр УИХ-ын гишүүд боловсрол, хөдөлмөр эрхлэлт, хөрөнгө оруулалт, орон сууц, төрийн албаны шинэчлэл зэрэг асуудлаар тодруулга авч, санал хэлсэн байна. Байнгын хороо хэлэлцүүлгийн үр дүнг нэгдсэн чуулганд танилцуулахаар шийдвэрлэжээ.