УИХ-ын Эдийн засгийн байнгын хорооны тавдугаар сарын 14-ний хуралдаанаар Санхүүгийн зохицуулах хорооны 2024 оны үйл ажиллагааны тайланг хэлэлцлээ. Тайланг тус хорооны дарга Т.Жамбаажамц танилцуулсан бөгөөд санхүүгийн зах зээлд хяналт тавьдаг 11 салбарын 6930 зохицуулалттай этгээдийн үйл ажиллагаанд хяналт тавьж буйг дурдав.

Санхүүгийн зах зээлийн нийт хөрөнгийн хэмжээ ДНБ-ий 26.5 хувьд хүрч, хөрөнгийн зах зээлийн үнэлгээ 13 их наяд төгрөгт хүрсэн байна. Нээлттэй хөрөнгийн биржид компанийн бонд давамгайлж буй бөгөөд нийт арилжаанд 1.5 их наяд төгрөгийн санхүүгийн хэрэгсэл арилжигдсан нь өсөлттэй үзүүлэлт юм.

Биржийн бус зах зээлд 95 компани 131 бүтээгдэхүүн гаргаж, нийт 1.6 их наяд төгрөгийн арилжаа хийгджээ. Ам.долларын бондын арилжаа ч нэмэгдэж, 72 сая ам.долларын бонд худалдаалагдсан байна. Харин нийт хувьцааны данс эзэмшигч 2.6 саяд хүрч, 204 мянга нь шинээр данс нээлгэсэн байна.

Даатгалын салбарт нийт 20 компани, 60 зуучлагч, 2500 гаруй төлөөлөгч үйл ажиллагаа эрхэлж байгаа бол банк бус санхүүгийн байгууллага 573 бүртгэлтэй байна. Финтек зээлийн дундаж хэмжээ 771 мянган төгрөг байхад уламжлалт ББСБ-ын зээлийн хэмжээ 2.5 сая төгрөгт хүрчээ. Зээлийн өрийн үлдэгдэл 5.7 их наяд төгрөг байна.

Мөн 178 хадгаламж зээлийн хоршоо нийт 75 мянга гаруй гишүүнтэйгээр ажиллаж байгаа бөгөөд нийт хадгаламж 248 тэрбум, зээлийн өрийн үлдэгдэл 258 тэрбум төгрөг болжээ.

Хороо өнгөрсөн онд бондын зах зээлийг дэмжих, хөрөнгө оруулагчийг хамгаалах, даатгалын баталгаа гаргах эрх зүйн орчныг бүрдүүлэх зэрэг онцлох ажлуудыг хэрэгжүүлсэн байна. Уг тайлантай холбогдуулан УИХ-ын гишүүд асуулт асууж, байр сууриа илэрхийлсэн юм.

Эх сурвалж: УИХ-ын Эдийн засгийн байнгын хороо