Гашуунсухайт–Ганцмод боомтын хил дамнасан төмөр замын бүтээн байгуулалтыг эхлүүлэхээр өнөөдөр /2025.05.14/ нээлтийн ёслолыг хийлээ.

Хил холболтын төмөр замыг 1.9 жилийн хугацаанд барьж ашиглалтад оруулахаар төлөвлөсөн бөгөөд 979 тэрбум төгрөг зарцуулна. Энэхүү төмөр зам баригдсанаар боомтын хүчин чадал хоёр дахин нэмэгдэж, нүүрсний экспорт 165 сая тоннд хүрч, жилд 1.5 тэрбум ам.доллараар орлого нэмэгдэхээр тооцоолж байна.

Энэ нь Монгол Улс БНХАУ-ын хооронд 1955 оны хэлбэрээр байгуулсан Замын-Үүд-Эрээний төмөр замаас хойш 70 жилийн дараа хийж буй төмөр замын хоёр дахь том бүтээн байгуулалт юм. Гашуунсухайт-Ганцмод боомтыг төмөр замаар холбох Засгийн газар хоорондын хэлэлцээрийг 2025 оны хоёрдугаар сарын 14-нд байгуулжээ.

УИХ-ын гишүүн, Тэргүүн Шадар сайд бөгөөд Эдийн Засгийн Хөгжлийн сайд Л.Гантөмөр:

-Гашуунсухайт–Ганцмодын төмөр зам бол зөвхөн нэг боомтыг холбох зам бус, харин Монгол Улсыг БНХАУ-ын зах зээлтэй холбох стратегийн гарц, орон нутгийн хөгжилд шинэ ажлын байр, орлогын эх үүсвэрийг бүрдүүлэх хөшүүрэг юм. Гашуунсухайт–Ганцмод боомтын төмөр замын холболт 2004 оноос эхлэн яригдаж, 18 жилийн турш улс төр, эдийн засаг, техник гээд олон талын ойлголцлын сорилт давж, эцэст нь хоёр улсын Засгийн газар хоорондын хэлэлцээр байгуулж, өнөөдөр ийнхүү бодит ажил болж байгаа нь түүхэн чухал алхам бөгөөд алдсан цаг хугацааг нөхөх боломж хэмээн үзэж байна.
Монгол Улсын урт хугацааны хөгжлийн бодлого "Алсын хараа-2050" хэрэгжүүлэх шинэ бүтээн байгуулалтаар эдийн засгаа тэлэх бодит хөшүүрэг болгон ашиглана. Энэхүү төмөр замын бүтээн байгуулалт түргэн шуурхай хэрэгжиж, үр дүнгээ өгнө гэдэгт эргэлзэхгүй байна. Хоёр улсын хамтын шийдвэрт олон хүний тууштай хөдөлмөр орсон гэдгийг онцлон тэмдэглэж, талархал илэрхийлье.

Гашуунсухайт боомтын шинэчлэл, төмөр замын бүтээн байгуулалт нь:

• Боомтын нэвтрэх хүчин чадлыг хоёр дахин нэмэгдүүлж,

• Тээвэр логистикийн зардлыг бууруулж,

• Экспортыг үе шаттай нэмэгджүүлж,

• Эдийн засгийн тогтвортой өсөлтийг хадгалж,

• Орон нутгийн хөгжилд шууд нөлөө үзүүлэх болно.

Зам дагаж хөгжил ирнэ гэдэг. Төмөр зам дагаж эдийн засаг сэргэдэг. Монгол, Хятад улсын найрамдалт харилцаа мөнхөд бат бэх байх болтугай.