Улсын Их Хурлын нэгдсэн хуралдаанаар Монгол Улсын Ерөнхий аудитораар томилогдсон С.Магнайсүрэн өнөөдөр тамгаа гардан авч, үүрэгт ажилдаа албан ёсоор орлоо. Түүнийг Ерөнхий аудитороор томилсон УИХ-ын тогтоолыг УИХ-ын Ерөнхий нарийн бичгийн дарга Б.Баасандорж Төрийн аудитын байгууллагын хамт олонд танилцуулсан байна.

С.Магнайсүрэн нь төрийн тэргүүн түшмэлийн албан тушаалд 12 жил 5 сар ажилласан туршлагатай бөгөөд Төрийн албаны болон Төрийн аудитын тухай хуулиар тавигдсан шаардлагуудыг бүрэн хангасан гэж танилцуулгад онцолжээ. Түүнийг томилох үед УИХ-ын дарга Д.Амарбаясгалан болон гишүүдээс төрийн аудитыг хараат бусаар, үр нөлөөтэй хэрэгжүүлэх талаар санал, зөвлөмж өгсөн байна.

Ерөнхий аудиторын тамга, албаны бичиг баримтыг хүлээлгэн өгөх үеэр Ерөнхий аудитор асан Д.Загджав шинэ томилогдсон албан тушаалтанд амжилт хүсэж, “Төсвийн хяналтыг хараат бусаар хэрэгжүүлэх хариуцлагатай үүргийг нэр төртэй биелүүлнэ гэдэгт итгэлтэй байна” хэмээн хэлсэн байна.

Харин шинээр томилогдсон Ерөнхий аудитор С.Магнайсүрэн “Төрийн аудитын байгууллага нь ил тод, нээлттэй байж, мэдээллийн технологийн дэвшлийг бүрэн ашиглах”-аа илэрхийлээд, төрийн албан хаагчдын ёс зүйн дүрэм, залгамж чанар, хариуцлага-ыг чанд баримтлан ажиллахыг хамт олондоо уриаллаа.

Мөн тэрээр аудитын явцад илэрсэн хууль тогтоомжоос давсан дүрэм, журмуудыг нэгтгэн, УИХ-д танилцуулах нэгдсэн мэдээлэл гаргахыг Санхүү болон Гүйцэтгэлийн аудитын газруудад үүрэг болгосон байна. Түүнчлэн эдийн засаг тэлж буй энэ үед хүний нөөцийн одоогийн бүтэц дээр тулгуурлан төрийн аудитын байгууллагын зорилго, зохион байгуулалт, чиг үүргийг тодорхойлох санал авах ажлыг эхлүүлэхийг албан хаагч бүрт даалгажээ.

Эх сурвалж: Төрийн аудитын газар, УИХ